![Елімізде екінші рет](/media/2023/07/10/su-dgarysy.jpg)
Жарыстың ашылу салтанатында Мәдениет және спорт министрі Асхат Оралов, Алматы облысының әкімі Марат Сұлтанғазиев, облыстық дене шынықтыру және спорт басқармасының басшысы Нұрбақыт Теңізбаев, Олимпиада чемпионы Дмитрий Баландин жарысқа қатысушыларды мерекемен құттықтап, үздік өнер көрсетулеріне тілектестіктерін білдірді.
– Бұл халықаралық жарыс елімізде осымен екінші рет өткізіліп отыр. Былтыр Қапшағай жағалауында 3 мың қонақ жиналып, дүбірлі дода өткен еді. Аты әлемге әйгілі Oceanman сайысы 15 мемлекетте, атап айтсақ, Испания, Италия, Греция, Мексика, Ресей, Малайзия, Швейцария, Украина, Араб Біріккен Әмірлігі, Колумбия, Түркия, Кипр, Франция, Румыния, Тайландта тұрақты өткізілетіндігін атап айта кеткен жөн. Елімізде өтіп жатқан биылғы шараға қатысушыларға ыстық ықыласымызды білдіреміз. «Oceanman Kazakhstan» сынды беделді жарысты жаңадан гүлденіп келе жатқан Қонаев қаласында өткізу біз үшін үлкен мәртебе.
Алматы облысы Қазақстандағы спорттық белсенді аймақ деп айтуға толық негіз бар. 2022 жылы өңірімізде 500-ден аса халықаралық және республикалық деңгейде спорттық шара өткізілген. Спорттық сайыстардың туризм дамуына қосар үлесі зор. Жағажай және су спорты түрлерінің астанасына айналуды көздейтін Қонаев қаласы мен Алматы облысы жайында көптеген шетелдіктер қызығушылық танытып, осы шұрайлы мекенге саяхаттауына себеп болуда, деді жарыстың ашылу салтанатында сөз алған өңір басшысы Марат Елеусізұлы.
Биыл халықаралық жарыстың географиясы кеңейді. Беделді бәсекеге 7 мен 70 жас аралағындағы 8 жас дәрежесіндегі спортшылар қатысуда. Олардың қатарында Ресей, Қырғызстан, Италия, Өзбекстан, АҚШ, Испания, Грузия, Израиль, Үндістан, БАӘ, Беларусь, Колумбия, Германия, Сауд Арабиясы, Украина, Пәкістан, Катар, Румыния, Тайланд және Қазақстан бар, барлығы 1 800 адамнан астам суда жүзу шеберлері бақ сынасты.
Oceanman – бұл әлемнің түкпір-түкпірінде жылына бірнеше рет өтетін турнир. Оның тұсауы 2015 жылы Испанияда кесілген. Одан кейін әлемнің ең көрікті жерлерінде жалғасып келеді.
Алматы облысы