Осыдан екі жыл бұрынғы әлем біріншілігінде төртінші орынға ие болған Қазақстан құрамасы элиталы кезеңде Нидерланд, Румыния және Әзербайжан футзалшыларымен бір топта ойнайды. Біздің команда үшін элиталық раунд қыркүйек айында сырт алаңдағы Нидерланд құрамасымен өтетін матчпен басталады. Іріктеу кезеңінің соңғы ойыны да сырт алаңда желтоқсан айында Румынияда өтеді.
Сонымен қатар жерлестеріміз 20 қыркүйекте өз елімізде Румынияны қабылдаса, 6 қазанда Әзербайжанға қонаққа барады. Ал 11 қазанда елордада Әзербайжан, 14 желтоқсанда Нидерланд футзалшыларымен шеберлік байқасады. Топ жеңімпазы Әлем чемпионатының финалдық кезеңіне тікелей жолдама алады. Екінші орын алған командалар 2024 жылдың сәуірінде өтетін өтпелі ойындарға қатысады.
