Сенатор «Ақтау теңіз порты АЭА» АҚ-ға барып, арнайы экономикалық аймақтың жұмысымен және оны одан әрі дамыту жоспарымен танысты. Депутат экономика салаларындағы қолдау шараларына түсініктеме берді және өңдеу өнеркәсібін одан әрі дамытуға бағытталған негізгі тетіктерге тоқталды.
- «Ақтау теңіз порты» арнайы экономикалық аймағы өңірдегі өнеркәсіп драйвері болып есептеледі. Жыл сайын аймаққа келетін шетелдік инвесторлардың саны көбейіп, жаңа жұмыс орындарын ашуға қосымша серпін беріледі, деп атап өтті Орынбасаров.
Сапар барысында «Атамекен» өңірлік кәсіпкерлер палатасының басшылығымен де кездесу ұйымдастырылды. Кездесуде кәсіпкерлік саласын дамыту, отандық және шетелдік инвесторларды тарту мәселелері талқыланды. Сенатор сондай-ақ түрлі проблемалық мәселелер бойынша тұрғындарды да қабылдады.
Депутат «Каспий тұщыландыру зауыты» ЖШС-де болып, тұщыландыру зауытын кеңейту жобасымен танысты. Зауытта жаңғырту жұмыстары аяқталғаннан кейін тәулігіне 40 мың текше метр теңіз суын тұщытуға мүмкіндік беретіні айтылды. Бекбол Орынбасаров аталған кәсіпорынның маңыздылығын атап өтіп, жөндеу-орнату жұмыстарының жақын арада сәтті аяқталатынына сенім білдіретінін жеткізді.
