Қоғамдық ұйым алдында тұрған негізгі міндет – жаңа туған сәбилер арасындағы өлім көрсеткішін азайту. Ұйымның алғашқы мәжілісінде осы жылдың бірінші жартыжылдығындағы нәресте өлімін төмендету бойынша атқарылған жұмыстар талқыланды. М.Оспанов атындағы БҚМУ №2 балалар аурулары кафедрасының доценті Арыстан Досымов балалар онкологиялық ауруларын ерте анықтау бойынша баяндама жасады. Ол кез келген медициналық мекеменің қызметкері онкологиялық дертке күдік тудырған белгілерді болдырмауға бағытталған жұмыстарды басты назарда ұстау керек екенін алға тартты.
Қазіргі уақытта Ақтөбе облысы тұрғындарының саны 922 мың 697 адам болса, оның 35%-ын 18 жасқа дейінгі жеткіншектер құрайды. Облыстық денсаулық сақтау басқармасы басшысының орынбасары Бақытжан Түлкібаеваның хабарлауынша, түрлі сырқатпен дәрігерлер есебінде тұрған сәбилер өңірдегі балалар санының 7,9%-ын құрайды. Дәлірек айтқанда, Ақтөбе облысында 6 мыңға жуық баланың денсаулығында кінәрат бар. Мәселен, 600 бала аутизм сырқатына шалдықса, 1 100 бала тірек-буын жүйесі кеселімен дүниеге келген. Кейінгі уақытта ақыл-есі кем, жүйке жүйесі кінәратымен дүниеге келген нәрестелер саны да азаймай тұр. Туабітті кемістігі бар сәбилер көбейген сайын балалар дәрігерінің жұмысы да күрделене түседі. Оның үстіне сәбилеріне екпе алуға үзілді-кесілді қарсы ата-аналармен түсінік жұмыстарын жүргізу учаскелік дәрігер мен медбикеге міндеттелген жазылмаған қағидаға айналды. Ашығын айтқанда, балалар дәрігерінің міндетін отбасылық жалпы тәжірибедегі дәрігер алмастырғалы бері сәби сырқатын ерте анықтап, емдеу ісі күрделеніп кетті.
Қазіргі уақытта Ақтөбе облысында 1 498 балалар дәрігері болғанына қарамастан педиатр маманның тапшылығы сезіледі, әсіресе, аудандық емханаларда. Кейінгі дерек бойынша өңірде 18 педиатр, 4 неанатолог маман жетіспейді. Осы тапшылықтың орнын толтыру мақсатында жыл сайын жергілікті бюджет қаражаты есебінен студенттерді оқыту жұмысы қолға алынып келеді. Биыл Ақтөбедегі М.Оспанов атындағы Батыс Қазақстан медицина университетін грант негізінде балалар дәрігері мамандығымен бес студент, неанатолог мамандығы бойынша үш студент аяқтап, аудандық ауруханаларға орналасып жатыр.
Бүгінде денсаулық сақтау басқармасында 36 штаттан тыс дәрігер тіркелген. Олардың қатарында зейнетке шыққан тәжірибелі мамандар да бар. Таяуда «Педиатр қоғамы» мүшелері 12 ауданның елді мекендерін аралап, ауыл тұрғындарына медициналық көмек көрсетпекші. Олардың жоспарында ең шалғай ауылдардағы дәрігерлік бақылаудан тыс қалған сәбилерді тексерістен өткізу бар.
