73 жастағы қария әлемді жаяу араламақ

Жасының ұлғайғанына қара­мас­тан тағы да тәуекелге барып, бұл жолы жер жүзін жаяу жүріп өту­ге бел буған қайсар да қуатты қар­ты­мыз қандай кісі?

Жаңаарқа топырағына кіндік қаны тамған қарияның саналы­ ғұ­м­ыры Ұлытауда, Жезқазғанда өтіп келеді. Қол­өнер­ге қатысты он шақ­ты­­ ма­ман­дықты игеріп алған, таби­ға­тынан ұсталыққа бейім С.Қотырашов Ұлытау ауда­ны­ның орталығындағы музейде көп­ жыл бойы реставратор бол­ды. Бір ғажабы, ол әлі күнге де­йін еңбектен қол үзген жоқ. Қазір Жезқазған темір-бетон зауы­тын­да токарь болып еңбек етеді. Айт­пақ­шы, биылғы сапарға нақ осы зауыт демеушілік танытып отыр.

Жезқазған тарихи-архео­ло­гия­­лық­ музейінде ақсақалды жаңа сая­ха­тына шығарып салу сал­танаты­ бол­ды. Салтанатта Жез­қаз­ған қала­сының әкімі Қайрат Шай­жанов, облыс­тық­ мәдениет, тіл және архив ісі мен қо­ғамдық даму басқармаларының басшылары Әнуар Омар, Дархан Мұхан, облыс­тық Ардагерлер кеңесінің төр­ағасы Сағындық Қожамсейітов, ақындар Мұқаш Сейт­қа­зинов, Қуаныш Мақ­сұтов ақса­қал­дың сапарына сәт­ті­лік,­ жолына жақ­сылық тіледі.

Сәрсенбай ақсақал: «Мұндай жолға шығу үшін алдыңа белгілі бір мақсат қою керек», дейді. Ол өткен жолғы сапарға алдына үш түрлі мақсат қойғанын атап өтті. Соның бірі жүрген жерлердегі қол­өнершілердің тізімін жасап,­ келі­сім­шартқа байланыс­ты­ ЮНЕСКО-ға­ табыстау бола­тын. Қазір соның арқа­сын­да елі­міздің қолөнер шеберлері арнайы сайт арқылы өз өнімдерін әле­м­нің кез келген еліне тапсырыс арқы­лы жөнелте алады. Сәрсенбай ақса­қал­дың саяхатының көпке тигіз­ген бір шарапаты осындай.

Биыл да ол алдына тағы үш түрлі мақ­сат қойып отыр. Біріншіден, әлем­ халқын бейбітшілікке ша­қыру, соғысқа жол бермеу. «Соғыс­та­ жеңген де, жеңілген ел де орасан зор шығынға батады, халық күйзеліске ұшырайды. Сондықтан соғыста жеңімпаз болмайды», деп санайды ол. Екіншіден, сала­мат­ты өмір салтын ұстанудың артық­шылығын дәлелдеу. Жас­та­йынан жаяу жүруді әдетке айнал­­­дырған ақсақал әлем халқына «Денсаулығыңды ойласаң, күніне кем дегенде 7 шақырым жаяу жүр» деген үндеу тастамақ. Үшіншіден, бәлкім, ең бастысы да сол болар, дүниедегі қарапайым адамдар арасында қазақ ұлтының ежелгі тарихы, мәдениеті жөнінде мағлұмат беру, таныстыру.

Бұл сапар бірнеше кезеңнен құралмақ. Тамыздың 2-сі күні Аты­рау­дан Астраханьды бетке­ алып жол­ға шығатын ақсақал Ресейдің бір­қатар жерін, Грузия­ны басып өтіп, Түр­кияға табан тіремек, Анкарадан Ыс­там­­бұл қала­сына шейін жаяу жүріп өтпек. Жалпы ұзындығы 2 890 ша­қырым құрайтын маршрут­ты­­ ақсақал 100 күнде аяқтауға ниет­ті.­

«Алла қуат берсе, сосын елге қайтып келемін де, 2024-2025 жыл­­­дары саяхатты қайта жалғас­ты­­ра­мын. Әлемнің Франция, Аме­рика, Қытай, Моңғолия тәрізді ел­дерінде бол­­ғым келеді», деген ақса­қал­ осы үш жылда 16 210 ша­қы­рым жер­ді жаяу­ араламақ.

Өзінің ғана емес, ұлтының қай­сар­­лығын әлемге паш еткелі жолға шық­қан ақсақалдың сапары оң болсын!