Күн сайын елордалық жедел бригаданың мыңнан астам әскери қызметшісі – офицерлер, сержанттар мен сарбаздар 2 ауысымда елорданың 5 әкімшілік ауданында қызметке кіріседі. Жауынгерлік қызметтің бірінші күні бөлім командирінің бірінші орынбасары – штаб бастығы, полковник Ержан Әбдіқалықов жас сарбаздардың қызметіне табыс тіледі.
Сондай-ақ әскери қызметшілерді Астана қаласы жергілікті полиция басқармасы бастығының міндетін атқарушы, полиция полковнигі Ержан Әділбеков және 5573 әскери бөлімінің ардагерлер кеңесінің төрағасы, запастағы подполковник Абай Дисенбеков құттықтады.
Полковник Ержан Әбдіқалықов жауынгерлік қызмет кезінде бригаданың әскери қызметшілері үнемі қылмыс фактілерін ашып, қылмыскерлерді ұстайтынын, ұрланған заттар мен есірткілерді тапқанын атап өтті. Олар сондай-ақ азаматтарға жоғалған балаларды немесе басқа туыстарын табуға жиі көмектеседі.
2023 жылдың бірінші жартыжылдығында елордалық бригаданың әскери қызметшілері 3 мыңнан астам құқық бұзушыны ұстады және полицияға тапсырды. Осы уақыт ішінде олар 80 рет қырағылықтың жарқын үлгісін көрсетті,
37 азаматты ұстауға көмектесті және 2 800-ге жуық әкімшілік құқық бұзушылықтардың жолын кесті.
Айта кетейік, жуырда ғана Ұлттық ұлан сарбазы суға батып бара жатқан спортшыны құтқарған болатын. 21 шілдеде елордадағы «Студенттік саябақта» қоғамдық тыныштықты бақылап жүрген Ұлттық ұланға қарасты 5573 әскери бөлімінің әскери жасағы өзен жағасынан өтіп бара жатып, суға тұншығып, көмекке шақырған баланы байқаған.
Әскери жасақ бастығы, қатардағы жауынгер Әлібек Ноғаев бұл туралы радиостанса көмегімен патрульдік топтың бастығы қатардағы жауынгер Ахат Матаевқа дереу баяндай салысымен киімін шешіп, суық суға секірген.
Белгілі болғандай, 12 жасар бала ескек есу бойынша жаттығу кезінде жел екпінінен каноэсі аударылып, суға бата бастаған. Осылайша, қырағы жауынгерлердің батыл және дер кезіндегі әрекеттері оны ажалдан аман алып қалды. Бала спорттық жаттықтырушысына табысталды. Олар құқықтық тәртіп қорғаушыларына алғыстарын айтты.
Қатардағы жауынгер Әлібек Ноғаев пен аталған әскери жасақтың барлық құрамы елордалық жедел бригада командирінің алғысына бөленді.
