Шымкент полициясына ұқсас мазмұнды арыз-шағыммен 235 адам жүгінді. Олар жалған тендрмен айналысатын алаяқтардың құрбаны болғанын айтып, тәртіп сақшыларынан көмек сұраған.
Жәбірленушілердің айтуынша, өз таныстары «тендрмен айналысатын бастығына» көмек қажеттігін айтып, несие рәсімдеуге үгіттеген. Жасаған жақсылығы үшін тиесілі үлесін беруге және банк алдындағы қарызды толық өтеуге уәде еткен.
Көбінесе олар несиені тауарлай рәсімдетіп, алынған қымбат техниканы қайта сатып, шыққан соманың 10-12% пайызын сыйақы ретінде беріп отырған. Алайда, ай сайынғы төлем уақыты келгенде, күдіктілер қоңырауға жауап бермей, ізін суытқан.
«Нәтижесінде несие өсімі көбейіп, азаматтар қарызға белшесінен батқан. 11 адамнан тұратын қылмыстық топтың құрбандары Түркістан облысының және Шымкент қаласының тұрғындары болып шықты. Аталған жайт ҚР ҚК-нің 190-бабы (Алаяқтық) бойынша тіркелді», делінген ведомство таратқан ақпаратта.
Құзырлы органдар күдіктілердің аты-жөнін анықтап, қамауға алды. Анықталғандай, алаяқтар тобы 23-43 жас аралығындағы, 4 әйел және 7 ер адамнан тұрған. Оның ішінде екі банк менеджері бар. Олардың әрқайсысының өз міндеттері болған: кейбірі несие алатын адамдарды табумен, тағы екеуі оны рәсімдеумен, қалғандары сатып алынған тауарларды алып-сатумен айналысқан екен.
Алаяқтар 340 млн теңгеге жуық шығын келтірді. Арызданушылар әртүрлі банктерден 250 мың теңгеден 6 млн теңгеге дейін қарыз алған. Тәртіп сақшылары жинақталған іс-құжаттарды айыптау актісімен сотқа жолдады.
Айыпталушылардың әрқайсысы жасаған қылмысы үшін 5 жылға дейін сотталды.
