Қоғам • 17 Тамыз, 2023

Президенттік жастар кадр резервіне даярлық

276 рет
көрсетілді
4 мин
оқу үшін

1 қыркүйекте Президенттік жастар кадр резерві жобасы басталады. Биыл жаңа резервшілер салалық қажеттілікті ескере отырып іріктеледі. Орталық коммуникациялар қызметі алаңындағы брифингте Мемлекеттік қызмет істері агенттігінің төрағасы Дархан Жазықбаев жобаның кезекті іріктеуінің ерекшеліктері туралы айтты.

Президенттік жастар кадр резервіне даярлық

Агенттік төрағасының айтуынша, үшінші іріктеудің ерекшелігі мемлекеттік аппараттың салалық кадрларға қажеттілігін ескере отырып, мақсатты іріктеу жүргізу болмақ. Осылайша, кезекті іріктеу инфрақұрылымды, өнеркәсіпті дамыту және сауда саясаты,  агроөнеркәсіптік кешен және қоршаған ортаны қорғау, сыртқы саясат және инвестициялар, экономикалық және қаржылық саясат,  цифрландыру және әлеуметтік саясат және азаматтық қоғам секілді 6 негізгі сала бойынша жүргізіледі. Осыған орай биыл үміткерлермен әңгімелесу міндетті түрде салалық орталық органдар өкілдерінің қатысуымен өткізіледі.

Талаптарға сәйкес, іріктеуге жасы 35-тен аспаған, жоғары білімі және 5 жыл жалпы жұмыс тәжірибесі бар, мемлекеттік тілді В1 деңгейінен төмен емес меңгерген Қазақстан Республикасының азаматы қатыса алады.

Президенттік жастар кадр резервінің мүшесі болу үшін үміткерлер 6 кезеңнен тұра­тын кешенді іріктеуден өтуге тиіс. Бірінші кезеңде 2023 жылдың 1-30 қыркүйегі аралы­ғын­да pkrezerv.gov.kz арнайы ақпарат­тық жүйесінде және онлайн режімде канди­даттардың құжаттарды қабылданады. Іріктеу объективтілігін қамтамасыз ету үшін кан­дидаттардың деректері жеке нөмір беру арқылы жасырылады. Осылайша, бағалау­шылар үміткердің кім екендігін білмейді.

Екінші кезеңде кандидаттардың мәтіндік және сандық ақпаратпен жұмыс істеу қабілеті бағаланады. МҚІА басшысы атап өткендей, тестілеу процесі аудио-бейне таспаға жазылып, прокторинг жүйесімен қадағаланады. Үшінші кезеңде ситуациялық тапсырмалар беріледі. Бұл кезең үміткерлердің таңдаған салалық бағыттарына байланысты ситуациялық тапсырмалар түріндегі нақты проблемаларды шешуге деген көзқарасы ескеріледі. Аталған кезең онлайн-режімде аудио-бейне жазбамен сүйемелденіп, эссе жазу форматында жүргізіледі.

«Орындалған тапсырманың шешімі қызметтің тиісті бағыттары бойынша бір уақытта үш салалық сарапшымен бағаланады. Сарапшылар пулы академиялық орта мен бизнес қауымдастық өкілдерін, мемлекеттік қызметшілерді қамтиды»,  деді Дархан Жазықбаев.

Төртінші кезеңде ассессмент-орталығы мен құзыреттер бойынша сұхбат өтеді. Ассессмент-орталық Мемлекеттік басқару академиясының базасында офлайн форматта өтеді. Ол мінез-құлық индикаторлары арқылы кандидаттардың бойындағы белгіленген құзыреттерді анықтауға және бағалауға бағытталған. Кандидаттардың мінезін бағалау топтық және жеке тапсырмалардан тұрады. Жалпы құзыреттерді кемінде 15 сертификатталған бағалаушы және 5 супервизор бағалайды.

Ал бесінші кезеңде кандидаттар сарап­шылық комиссия мүшелерімен әңгімелеседі. Оның құрамына мемлекеттік органдардың басшылары кіреді. Нәтижесінде, Ұлттық комиссия отырысында қарауға ұсынылатын қатысушылардың тізімі жасалады. Алтыншы, соңғы кезеңде Ұлттық комиссияның отырысы өтіп, Президенттік жастар кадр резервіне үздік 50 кандидат қабылданады. ПЖКР талаптарына сәйкес резервке алынған адамдар заңнамада белгіленген тәртіппен мемлекеттік саяси лауазымдарға, «А» корпусының мемлекеттік әкімшілік лауазымдарына, «Б» корпусының басшылық және А санаттар тобының лауазымдарына тағайындалуы мүмкін.

Дархан Жазықбаевтың айтуынша, агенттік іріктеудің барынша ашықтығы мен объектив­тілігін қамтамасыз етуге бағытталған. Канди­даттарды бағалау нәтижелері олардың жеке каби­нетінде және кезең қорытындысы pkrezerv.gov.kz сайтында жарияланып, барлық азаматтар үшін қатысушылар туралы ақпарат қолжетімді болады.

Брифинг соңында МҚІА төрағасы жастарды іріктеуге белсенді қатысуға шақырып, кәсіби мемлекеттік қызметшілердің жаңа легін қалыптастыру маңыздылығына тоқталды.

Атап өтсек, 2019 және 2021 жылдары резервке алынған 350 адамның 264-і мемле­кеттік органдар мен квазимемлекеттік сектор ұйым­дарында жұмыс істейді, яғни жалпы сан­ның 75%-ы жұмысқа орналастырылған. Олар­дың 128-і орталық мемлекеттік органдар­да, 38-і жергілікті атқарушы органдарда, 57 адам ұлттық компанияларда, 41 адам адам өзге де ұйымдарда қызмет жасап жатыр. Сон­дай-ақ олардың қатарында 31 резервші саяси, 6 резервші «А» корпусының лауазымдары­на таға­­йын­далған, біреуі – Парламент Мәжілісінің,  екеуі – мәслихаттың депутаты.