Өңірде үш ауысымды мектептерді және орын тапшылығын жою мақсатында былтыр 710 орындық 4 мектеп салынып, қолданысқа берілген еді. Биыл 16 мектептің құрылысы жүргізіліп жатыр. Оның 9-ы 1 қыркүйекте пайдалануға берілді. Соның бірі – Еңбекшіқазақ ауданының орталығы Есік қаласындағы №6 мектеп-лицейі. Оның ашылу салтанатына Алматы облысы әкімінің орынбасары Нұржан Құдайбергенов қатысып, ұстаздар мен оқушыларды, ата-аналарды жаңа оқу жылының басталуымен құттықтады.
– Облысымызда алдағы уақытта «Жайлы мектеп» ұлттық жобасы аясында 53 мектеп салу жоспарланып отыр. Сондай-ақ өңірде жеке инвестордың есебінен 1 800 орындық 2 мектеп салынып жатыр. Бүгін пайдалануға берілген 1 500 орындық жаңа мектеп бұған дейін үш ауысымда жұмыс істеп келген Терешкова, Тоқатаев, №1 Рахат орта мектептерінің проблемасын шешіп отыр. Мектеп құрылысын «BI Global» серіктестігі жүргізді. Ендігі кезекте осындай зәулім мектепте оқитын балалар бізді жақсы жетістіктерімен қуантады деп сенеміз, – деді ол.
Жаңадан салынған мектеп-лицей оқушыларды тек қазақ тілінде оқытады. Білім ордасы соңғы үлгідегі технологиямен жабдықталған 82 кабинеттен тұрады. Сондай-ақ лицейде кітапхана, екі спорт залы, оның бірі 310 орындық жылжымалы электр платформасы бар акт залымен біріктірілген, екі киім ілетін бөлме және үш жүзге жуық бала бір мезгілде тамақтанатын асхана бар. Нысан үш қабаттан және үш блоктан тұрады. Оқу ғимаратында талапқа сай шағын футбол, баскетбол алаңы мен жүгіру жолы салынған.
– Осы мектептің салынатынын естігенде қуанып, пайдалануға берілуін асыға күттік. Себебі бұған дейін балаларым үш ауысымды мектепте оқып келді. Енді, міне, сәулетті де кең мектепке немерелерімді әкеліп отырмын. Бек қуаныштымыз, – деді қала тұрғыны Р.Малдыбайқызы.
Есік қаласындағы мектеп-лицейге Білім күні 570 бала партаға отырып, сабақтарын бастады.
Дәл осындай қуанышты сәтті Іле ауданы, Боралдай ауылындағы №54 орта мектептің ашылу салтанатына қатысқан тұрғындар да бастан өткерді. 1 500 орындық жаңа мектеп осы уақытқа дейін үш ауысымда жұмыс істеген №17 орта мектептің мәселесін түбегейлі шешті. Бүгінгі таңда аталған мектепке 1 200 оқушы қабылданып, 52 сынып ашылды. Мектеп құрылысын «BI Global» серіктестігі жүзеге асырды.
Бұл күні Іле ауданында тағы екі мектеп – Междуреченск ауылындағы 1 500 орындық №55 орта мектеп және Көкқайнар ауылында 1 500 орындық №53 орта мектеп оқушыларға есігін айқара ашты. Аталған мектептер оқушыларды қазақ тілінде оқытады әрі екі ауысымда жұмыс істейді.
Сондай-ақ бұл күні Жамбыл ауданының Ұзынағаш ауылында 1 500 орындық №1 мектеп-лицейі жұмысын бастады. Қаскелең қаласында 1 500 орындық мектеп-гимназиясы, Қарасай ауданының Алмалыбақ және Іргелі орта мектептеріне қосымша 600 орындық жапсарлас ғимараттар, Қонаев қаласында 900 орындық орта мектеп пайдалануға берілді. Қалған бес мектептің құрылысы жыл соңына дейін аяқталады деп күтіліп отыр.
Алматы облысы
