Аймақтар • 05 Қыркүйек, 2023

Жайық жайылмасындағы қоқиқаз

695 рет
көрсетілді
2 мин
оқу үшін

Атырау қаласының маңында «Сасық сай» аталатын булану алаңы бар. Жайық өзенінің сол жағалауындағы сарқынды су құйылатын алаң 1945 жылдан бері бар. Жақында осы алаңға қоқиқаздар оралды.

Жайық жайылмасындағы қоқиқаз

«Ақжайық» мемлекеттік табиғи резерваты ғылым және мониторинг бөлімінің ғылыми қызметкері Илья Бофоновтың айтуынша, бұрын қоқиқаздар Атырау қаласының маңына жақын келген емес. Мұндай жайт өте сирек кездеседі.

«Қазір құстардың жылы жаққа оралатын кезеңі басталды. Осындай миграция кезінде құстардың дені аялдайтын су айдынын іздейді. Атыраудағы «Сасық сай» булану алаңы қоқиқаздардың аялдайтын орнына айналды. Демек бұл алаңда қоқиқаздарға табиғи азық – ұсақ шаянтәрізділер бар деп болжауға болады. Қа­зір мұнда өсімдіктер мен микро­ағзаларды өсіретін микро­биологиялық үдеріс жү­­ріп жатыр», дейді Илья Бо­фонов.

Оның пікірінше, «Қызыл кі­тапқа» енгізілген қоқи­қаз­дар­дың қонғанына қара­ғанда, булану алаңының экологиялық жағдайы жақсара бастаған болуы мүмкін. Өйткені қоқиқаз ластанған су айдынына қон­байды.

Облыстық энергетика және тұрғын үй-коммуналдық шаруа­шылық басқармасының мәліметіне сүйенсек, Атырау қалалық әкімдігі 476 гектар аумақ­та орналасқан булану алаңын қалпына келтіру үшін жобалық-сметалық құжаттамасын әзірлеген. Екі жыл бұрын сараптаманың оң қорытындысы алынған соң қалпына келтіру жұмысы басталған.

«Жобаны іске асырудың бірінші жылында топырақ тасылып, бөгеттер салынды. Арнайы алаң дайындалды. Тұнба шөгінділері жиналып, учаскелер қамыстан тазартылды. Ал былтыр булану алаңы 355 мың текше метрден астам тұнба шөгіндісінен тазартылды. Бөгеттерді толтыру, тегістеу және тығыздау үшін инертті материалдар сатып алынды. Жоба бойынша булану алаңын қалпына келтіруді жыл соңына дейін аяқтау жос­парланып отыр», деп хабарлады басқарма мамандары.

 

Атырау облысы