Биыл өңірдегі 200-ге жуық адам жұмысқа орналасты. Бұл орайда жасы елуден асқан адамдардың тиімді жұмыспен қамтылуына айрықша назар аударылып отыр. Қазіргі күні аға буын өздерінің қолынан келетін жұмыспен қамтылып, зейнет демалысына шыққанда толымды зейнетақы алу мүмкіндігіне ие болып отыр.
– «Күміс жас» жобасы бойынша мүмкіндіктің бәрі екшеліп, таразы басына тартылғаннан кейін 189 адамды жұмысқа орналастыруды жоспарлаған едік. Бұл жоспар 104,2 пайызға орындалды. Бір жақсысы, 33 адам лайықты жұмыс істеп, зейнет демалысына сәтті шықты. Біздің орталық арқылы жұмысқа орналасқан адамның 13-і таяу арада еңбек демалысына шықпақ. Олар мемлекеттік бағдарлама аясында жасалып жатқан қамқорлыққа дән разы, – дейді облыстық Жұмыспен қамтуды үйлестіру және әлеуметтік бағдарламалар басқармасының еңбек ұтқырлығы орталығының директоры Асыл Молдиярова.
«Күміс жас» жобасына қатысушылар үшін төленетін еңбекақының 70 пайызын орталық субсидиялайды. Ақыл таразысына салып қарасаңыз, бұл тәсіл – жұмыс беруші үшін де көп-көрім демеу. Әсіресе зейнетке шығуға жасы таяп қалған адамдар үшін тиімді.
Шындығын айтқанда, күш кеміп, қуат қашып, егде тартқан адамдардың жұмысқа орналасуы да шырғалаң екені – шындық. Міне, осы сәтте екі иінінен басқан жүктің салмағын жеңілдетіп, орайын келтіру қоғамды ізгілендіре түсері даусыз.
– Алпыстан жасым асқан соң қарап қалғаным салымды суға кетіріп еді. Аудандық орталыққа жүгінуге тура келді. Халықты жұмыспен қамту орталығының маманы бос жұмыс орындарын ұсынды. Сондай-ақ «2021-2025 жылдарға арналған кәсіпкерлікті дамыту жөніндегі ұлттық жоба» жаңа бағдарламасына қатысуға ұсыныс жасады. Несі бар, біз жұмыстан қашпаймыз ғой. Сөйтіп, құрылыс саласынан қолымнан келетін жұмыс табылды, – дейді Атбасар қаласының тұрғыны Серікбай Қараноғаев.
Адамдардың бойында болашаққа деген сенім оты осындай қамқорлықтың ұшқынымен лаулайды.
– Масыл болғаннан өз наныңды адал еңбегіңмен тапқан жақсы емес пе? Осы уақытқа дейін жұмыс іздеп табанымнан таусылдым. «Күміс жас» бағдарламасы туралы кездейсоқ естіген едім. Жанашырлығы мол жақсы бағдарлама екен. Ел қамын жеген осындай қамқорлық бар жерде біз өзімізді дәрменсіз санамаймыз, – дейді Көкшетау қаласының тұрғыны Алпысбай Көшімбаев.
«Күміс жас» бағдарламасының жан жадыратарлық шарапаты егде адамдардың үміт отын тұтатып, көкірегін сәулелендіріп тұр.
Ақмола облысы
