Ұлттық спорт • 07 Қыркүйек, 2023

Елдік пен ерлікті шыңдайтын жорық

200 рет
көрсетілді
3 мин
оқу үшін

Биыл екінші рет ұйымдас­тырылып отырған «Ұлы дала жо­рығы» республикалық мара­фон-бәйгесіне әр өңірден 19 команда қатысты. Олар кеше елорда іргесіндегі Қаражар ауылынан жорыққа аттанып кетті. Шабандоздар 1 300 шақырым қашықтықта жарысатын ма­рафон-бәйге 19 қыркүйек күні Түркі әлемінің рухани астанасы – Түркістан шаһарында өз мәресіне жетеді.

Елдік пен ерлікті шыңдайтын жорық

Жорыққа қатысушыларды шы­ғарып салу шарасына ма­ра­фонға ұйытқы болған ұлт­тық спорттың жанашырлары – «Amanat» пар­тиясының Ат­қарушы хатшы­сы Дәулет Кә­­рібек, Туризм және спорт минис­тр­­лігі Спорт және дене шы­нық­­тыру істері коми­теті төр­аға­сы­ның орынбасары Бек­болат Бай­жанов, Ұлттық спорт қауым­дастығының төрағасы Исламбек Салжанов, «Joryq» ат спорты федерациясы қамқоршылық кеңе­сінің төрағасы Әлібек Әлденей қатысты.

Айтулы шарада Ұлттық спорт қа­уымдастығының төра­ғасы Ис­ламбек Сал­жанов ма­рафон-бәйгенің маңыз­дылы­ғына тоқтала келе, жобаны ұйым­­дас­тырған және оған қол­дау біл­дірген азамат­тарға ал­ғысын біл­дірді.

сми

«Кеше ғана Ұлттық спорт түрлері бойынша VI фести­валь­дың ресми ашылуын өткіздік. Ал бүгін баршамыз екінші рет ұйымдастырылып отырған «Ұлы дала жорығының» басталу салтанатына жиналып отырмыз. Ұлт­тық спорт қауымдастығы 2 жыл қатарынан серіктес болып, «Ұлы дала жорығы» жобасын қолдап отыр. Ұлттық спортымыз – ата-бабаларымыздан бізге қалған асыл мұрасы және аманаты. Ұлттық спорттың артында ұлтымыздың рухы мен намысы, тарихы мен салт-дәстүрі тұр. Ұлттық спортымыз – елімізді біріктіретін негізгі факторлардың бірі.

Мемлекет басшысы Қасым-Жомарт Тоқаев ұлттық спорттың дамуы мен насихатталуына ерек­ше назар аударып отыр. «Ұлы дала жорығы» – әлемде жоқ республикалық марафон-бәйге. Бүгін осы бәйгеге еліміз­дің бар­лық аймағынан 100-ден аса шабандоз қатысты. Барлығына сәт­тілік тілей­мін!» деді Исламбек Төлеу­байұлы.

«Ұлы дала жорығы» мара­фонының жалпы жүлде қоры – 65 млн теңге. Жеңімпаз командаға – 30 млн теңге, 2-орын­ға – 20 млн теңге, ал 3-орынға 15 млн тең­ге табыс­талмақ. Марафон-бәй­генің ұйым­дастырушысы Ғани Дүй­ше­новтің айтуынша, жорық ба­рысын 2 халықаралық және 2 отан­дық төреші бағаласа, ал жол бойы аттардың жағдайын 2 халықаралық және 3 өз еліміздің мал дәрігері қадағалайды.

чсм

«Жорық 14 кезеңнен тұрады. Бірін­ші кезең – 50 шақырым. Одан кейінгі 12 кезеңде 100 ша­қырымдап жүріп отырады. Соңғы 14-кезеңде 50 шақырым жол­ды бағындырып, Түркістанда мәреге жетеді. Атырау облысынан басқа барлық өңірден командалар қатысып жатыр, барлығы марафонға сақадай-сай. Кеше аттар ветеринариялық тексеруден өтті», деді Ғ.Дүйшенов.

Айта кетсек, «Ұлы дала жо­рығы» марафон-бәйгесі рес­пуб­ликалық «Joryq» ат спорты фе­дерациясының, Туризм және спорт министрлігінің, «Аманат» партиясының және Ұлттық спорт түрлері қауымдастығының қол­дауымен өтіп жатыр.