Университет • 06 Қыркүйек, 2023

Университеттегі шеберхана

204 рет
көрсетілді
2 мин
оқу үшін

Қазақ ұлттық аграрлық зерттеу университетінде ағаш, пластик материалдарынан оқу орнына қажетті бұйымдар жасайтын шеберхана, іс тігетін машиналармен жабдықталған тігін цехы және кір жуатын бөлме іске қосылды. Сонымен қатар арзан бағамен азық-түлік сататын әлеуметтік дүкен мен дәріхана пайдалануға беріледі.

Университеттегі шеберхана

Университет базасында ішкі қажетті­ліктерді өтеу мақсатында бүгінде әлемнің көптеген университетінде іске асып келе жатқан студенттерге қызмет көрсететін орын­­дардың ашылуы баға жағынан да, уа­қыт үнемдеу тұрғысынан да тиімді болмақ.

Университет аумағында 1978 жылы жабық спортзал ретінде тұрғызылған екі қабатты ғимарат ұзақ жыл бойы жекемен­шікке жалға беріліп, кейіннен қойма ретін­д­е пайдаланылып келген-ді. Білім орда­сының инфрақұрылымды дамыту және әлеуметтік мәселелер жөніндегі орын­басары Қуат Сұлтанғазиевтің айтуын­ша, тозығы жетіп төбесінен су аққан, есік-терезелері бүлінген, жылу жүйесі істен шыққан бұл ғимарат жаңа басшылықтың тапсырмасымен биыл толық жөндеуден өтті. Сонымен қатар цех ішіне әртүрлі үлгі мен материалды дайындау, өңдеу, формалау және құрастыру үдерістерін үздіксіз жүргізетін шетелдік арнайы станоктар орнатылды.

– Енді университеттің оқу корпус­тары мен жатақханаларына арналған офистік жиһаздар, есік-терезелер мен пар­та­лар, аудиториялардағы дизайндік плас­тик өрнектер, гүлзар бақтардағы орын­дықтар, асханалардағы үстелдер, басқа да күнделікті тұтынатын материал­дар өзімізде жасалады. Біз осы салада үлкен тәжірибесі бар шебер мамандармен бірлесіп, серіктестік негіз­де жұмыс істейміз. Бұған қоса тігін це­хы күрделі жөндеуден өтіп, жақында іске қосылды. Нәтижесінде, барлық жа­тақ­ханадағы төсектік орын жабдықтары, мат­растар мен жамылғылар, терезе перделері толықтай жаңартылды. Мұның барлығы университетіміздің қазіргі және болашақтағы инфрақұрылымдық дамуына ықпал етеді. Оның бәрі студенттердің игілігіне арналған, – дейді Қ.Сұлтанғазиев.

Қазіргі кезде оқу-зертханалық корпустар мен жатақханалардың айналасы абаттандырылып, «Алтын дән» студенттер асханасы қайта жаңғыртылды. Сонымен қатар биыл 8 оқу корпусына және 7 студенттік жатақханаға ағымдық және екі жатақхананың шатырына күрделі жөндеу жасалды. Орталық стадион мен ветеринарлық клиникаға қатысты құрылыс жұмыстары аяқталуға жақын. Кейінгі он жылда алғаш рет қолға алынған мұндай ауқымды жұмыстар студенттердің сапалы білім алуына, спортпен айналысуына, бос уақыттарын тиімді өткізуімен қатар қосымша жұмыс орындарының ашылуына ықпал етеді.

 

АЛМАТЫ