Суретті түсірген – Ерлан ОМАР, «ЕQ»
Негізі зауытта үш түрлі теміржол машинасы жасалады. Олар: бір секциялы ТЭ33АС сериялы магистралдық жүк тепловозы, бір секциялы ТЭ33А сериялы магистралдық жолаушылар тепловозы және ТЭМ 11А сериялы маневр тепловозы. Қазір толық қуатында жұмыс істеп тұрған зауытта ай сайын 10 локомотив құрастырылады.
Аталған зауытта жаңа технологиялар енгізіліп, экологиялық таза, экономикалық тұрғыда өте үнемді теміржол машиналары құрастырылып жатыр. Сондай-ақ инновациялық тәсілдердің ұтымды қолданылуы және зауытта кілең кәсіби мамандардың жұмыс істеуі кәсіпорынды жаңа белеске көтерді. «Сөйтіп, зауытты ішкі және сыртқы нарыққа локомотив шығару мен жеткізуде көшбасшылардың біріне айналдырды. Кейінгі 10 жылда компания локомотивтері әлем елдерінің сұранысына ие болып үлгерді. «Зауыт тарихында 2023 жылдың 17 тамызы айтулы дата болып қалады. Бұл күні 500-локомотив шығарылды», дейді «Локомотив құрастыру зауыты» АҚ-ның өндіріс бойынша вице-президенті Төлеген Жаңабаев.
Кәсіпорынның 500 локомотиві еліміздің «Қазақстан темір жолы» ұлттық компаниясының пайдалануына жіберілген. Қазіргі таңда зауытта 800-ден астам жұмысшы еңбек етеді.
Жалпы, отандық локомотивтердің сапасы мен сенімділігіне ішкі ғана емес, сыртқы нарық тұтынушылары да жоғары бағасын беріп отыр. Белсенді маркетингтік қызмет пен басқа елдермен серіктестік қатынастарды сәтті орнатудың нәтижесінде компания өз өнімдерін әлемдік нарыққа шығарып келеді. Бүгінгі күнде отандық локомотивтер бірқатар алыс-жақын шетелдерге экспортталған. Олардың қатарында Әзербайжан, Украина, Түрікменстан, Тәжікстан, Қырғызстан, Молдова бар.
Кәсіпорын өз табысының маңызды факторларын инновациялар мен технологияларды дамыту бағытынан көреді. Өз кезегінде компания зерттеу мен әзірлемелерге белсенді қатысып жүр.
«Локомотив құрастыру зауыты» АҚ қол жеткізген осы жетістігі шеңберінде ғана қалып қоймайды. Өндіріс көлемін әрі қарай ұлғайтуға, инновацияларды жалғастыруға және жеткізу географиясын барынша кеңейтуге күш салады. Біздің жоспарымызда соны серіктестермен ынтымақтастық орнату, жаңа технологияларды енгізу, сондай-ақ локомотивтердің басқа да моделдерін әзірлеу сынды жобалар бар», дейді Маркетинг және сату бөлімінің бастығы Рауан Дөңсебаев.
Локомотив құрастыру зауыты – еліміздегі жетекші кәсіпорындардың бірі ғана емес, қазақ елінің мақтанышы. Өндірістің жоғары деңгейі мен өнім сапасының арқасында компания халықаралық аренада өзінің қатысуын нығайтуды жалғастырып жатыр. Ал зауыт ұжымы Қазақстанды сенімді және инновациялық локомотивтерді экспорттаушы ел ретінде таныстырып жатқандарын мақтаныш көреді. Оның анық дәлелі ел алдында.
Ең бастысы елімізден шығарылған локомотивтердің тиімділігі жоғары, пайдалану шығыны аз және экологиялық қауіпсіз қасиеттерге ие.
Мемлекет басшысы атап өткендей: «Қазір көптеген ел ішкі нарықты қорғау шараларын белсенді түрде қолданып отыр. Тіпті дамыған елдер протекционистік индустриялық саясатқа көшті. Қазақстанда ДСҰ классификациясы бойынша ішкі нарықты қорғау деңгейі төмен болып саналады, тек 128 тарифтік емес шаралар қолданылады. Сондықтан бізге сауда саясатында жаңа, батыл тәсілдер қажет».
Әрине, бұл шетелдік акционерлерге біздің зауытты дамытуға қосымша қаражат салуға жаңа бір жігер сыйлайтындай. Ескере кетін бір жайт, тек 2022-2023 жылдардың өзінде ғана зауыт акционерлері қосымша цехтардың құрылысына және жабдықтарды сатып алуға қосымша 3,5 миллиард теңгеге жуық инвестиция салды. Бір қуанарлығы, мұның бәрі мүмкін болды. Қазір олар ел басшылығының отандық өндірушілерді қолдауға және дамытуға дайын екенін де көріп-біліп отыр. Жалғыз отандық локомотив өндіруші кәсіпорынның қызметкері ретінде айтарым, Президенттің «Мемлекет отандық өндірушілерді қорғауға міндетті. Бұл біздің экономикамызды сыртқы әлемнен жабу сигналы емес. Ол ашық күйінде қалуы керек, бірақ ұлттық бизнестің мүдделерін ескере отырып» дегеніне қатты қуандым», деді Т.Жанабаев.
