Еңбек • 13 Қыркүйек, 2023

Еңбек озаттары марапатталады

373 рет
көрсетілді
2 мин
оқу үшін

Президент тапсырмасын іске асыру мақсатында былтыр «Қоғамда еңбек құн­дылығы идеологиясын ілгерілетудің 2023-2025 жылдарға арналған ке­шенді жоспарын» бекіткен еді. Сонымен бірге Үкімет қаулысымен елімізде қыр­күйектің соңғы жексенбісі Еңбек күні болып жарияланды. Бүгінгі таң­да даталы күнді атап өтуге байланысты тиісті іс-шаралар атқарылып жатыр.

Еңбек озаттары марапатталады

Қарапайым еңбек адамын насихаттау­ға арналған мереке аясында Шымкент­те де біраз іс-шара ұйымдастырылады. Бұл туралы мемлекеттік еңбек инспекциясы басқармасының басшысы Бауыржан Қалжанов арнайы брифингте мәлімдеді.

«Министрлік тарапынан 2023 жылы 28 тамызда Еңбек күнін мерекелеу бо­йынша іс-шаралар жоспары бекітілген. Осының аясында 21 қыркүйекте «Еңбек жолы» конкурсының өңірлік кезеңі­нің жеңімпаздары, еңбек ардагерлері, өндіріс озаттары марапатталады. Ал 15 қыркүйектен бастап азаматтардың барлық санатына, оның ішінде мүгедектігі бар адамдарға, жұмыссыз жастарға жұмысқа орналасуға жәрдемдесу бо­йынша бос орындар жәрмеңкелері, Ашық есік күндері ұйымдастырылады. Сондай-ақ тұрғындарды 16, 17 қыркүйек күн­дері А.С.Пушкин атындағы кітапханада «Еңбек галереясы» фотокөрмесіне ша­қырамыз. 20 қыркүйектен бас­тап кинотеатрлар мен кинозалдарда еңбек адамдары туралы көркем және деректі фильмдер көрсетіледі. «Менің жетістігім – менің нәтижем» ұранымен «Еңбек күніне» ар­налған спорттық іс-шаралар да мереке көркін қыздыра түседі», деді Б.Қалжанов

Оның айтуынша, сонымен қатар #EnbekEri хэштегі бойынша еңбек адамдары туралы ең үлгілі әңгімелер бойынша онлайн байқау Еңбек күні қарсаңында қорытындыланады.

Осыдан біраз уақыт бұрын «Еңбек жолы» конкурсының өтетіні хабарлан­ған еді. Конкурс ережесінің талаптарына сәйкес үміткерлер байқаудың өңірлік деңгейінде іріктелді. Соның нәтиже­сін­де конкурсқа қатысуға 38 адам өтініш білдірді. Оның ішінде үміткерлер «Үз­дік еңбек әулеті», «Жұмыс істейтін жастар­дың үздік тәлімгері», «Өндірістің үздік жас қызметкері» аталымдары бойын­ша бақ сынасады.

Қазіргі уақытта аталған конкурс қо­ры­тындыланып, жеңімпаздары анық­тал­ды. Сыннан сүрінбей өткендерге 21 қыр­­күйекте дәл Еңбек күні мереке­сінде сый-­сияпаттар табысталады.

«Осы ретте қала тұрғындары мен қонақтарын Еңбек күніне арналған іс-шараларға қатысуға шақырамыз. Және де кәсіпорындар мен мекеме басшылықтары сол күні жұмыскерлерін мерекемен құт­тық­тап, Еңбек күнін әр ұжым өз деңгейін­де атап өтсе игі болар еді», деп сөзін түйіндеді бас еңбек инспекторы.

 

ШЫМКЕНТ