Қола – қолда, алтын – алда

86 кило салмақтағы Азамат Дәулетбековтің литвалық До­мантас Павлюченко, ресейлік Арс­лан Багаев және Рақым Ма­гамадовты ойсырата ұтып, жар­тылай финалда АҚШ-тың атақ­ты балуаны, Олимпиада мен әлемнің екі дүркін чемпионы Дэ­вид Тэйлорға жол бергені жа­йында біз бұған дейін де хабарлағанбыз. Үшінші орын үшін бәсекеде қандасымыздың жолы Бахрейннің туы астында өнер көрсетіп жүрген да­ғыс­тандық Магомед Шәрі­повпен қиысты. Бұл белдесуде ұтылып жатқан Азамат қар­сыласын жығып алды да, артына шығып, соңғы секундта же­ңісті Магомедтің уысынан жұлып әкетті. Есеп – 4:3. Осы­лайша, Дәулетбеков әлем чем­пионатының екі дүркін қола жүлдегері атанды. Былтыр дәл осы Белградта ол үшінші орынға табан тіреген еді. Со­нымен қатар Азамат Париж Олимпиадасының лицензиясына да иелік етті.

Ал 61 кило салмақтағы Өсім­жан Дастанбек жұбаныш бәсекесінде жеңіліс тапты. Оның алдында Санжар Досжанов (70 кило) пен Юсуп Батырмұрзаев (125 кило) тұсаукесер кезде­сулерінде тізе бүккен болатын. Жоғарыда көрсетілген салмақ дәрежелерінде мына балуандар жеңіс тұғырына көтерілді:

61 кило: 1. Виталий Оруджев (АҚШ), 2. Абасгаджи Магомедов (Ресей), 3. Тайырбек Жұмашбек (Қырғызстан) пен Шота Пар­тенадзе (Грузия).70 кило:

1. Әмир Яздани (Иран), 2. Зейн Резерфорд (АҚШ), 3. Рамазан Рамазанов (Болгария) пен Арман Андреасян (Армения). 86 кило: 1. Дэвид Тейлор (АҚШ), 2. Хасан Яздани (Иран), 3. Майлс Амине (Сан-Марино) мен Азамат Дәулетбеков (Қазақстан). +125 кило: 1. Әмір Заре (Иран), 2. Гено Петриашвили (Грузия). 3. Таха Акгюл (Түркия) мен Мэйсон Пэррис (АҚШ).

Жарыстың екінші күні тағы төрт салмақ дәрежесі бойынша бәсекелер өтіп, жүлделі орындар үшін таласатын апай­төс­тер анықталды. 57 кило сал­мақтағы Мейрамбек Қартбай Пуэрто-Риконың өкілі Да­риан Тои Круз (+5:5) бен Мы­сырдың мықтысы Гамаль Мо­хамедті (10:0) сүріндірді. Ши­рек финалда ол Еуропа чемпионы (U-23), германиялық Ник­лас Штехелені (4:1) шаң қап­тыр­ды. Бірақ жартылай финалда Рио Олимпиадасының күміс жүлдегері, әлем және Азия чемпионы, жапониялық Рей Хигучиге (0:11) жарытып қарсылық көрсете алмады.

70 килолық Нұрқожа Қай­­панов эстониялық Эрик Рейн­­бокты (10:0) ойсырата ұт­қа­нымен, келесі кезеңде То­кио Олим­пиадасының қола жүл­дегері, әлемнің төрт дүркін чем­­пионы, америкалық Кайл Дейк­ке (4:9) әлі жетпеді. 79 кило салмақтағы Болат Сақаев канадалық Джасмит Пхулка (12:1) мен болгариялық Михаил Георгиевті (7:1) еш қиналмай ең­сергенімен, ширек финалда әлем біріншілігінің (U-23) жеңімпазы, грузиялық Владимир Гамкрелидзенің (1:8) осал тұсын таба алмады.

92 кило салмақ дәрежесінде күш сынасқан Ризабек Айт­мұханға айрықша риза болдық. Бас­тапқы бәсекелерде ол ма­жарстандық Балхаш Юхас (13:3) пен Түркияның аса дарын­ды балуаны, Еуропаның екі дүр­кін чемпионы Фейзолла Ақ­тюрктің (11:0) тас-талқанын шығарды. Жартылай финалда был­тырғы жылғы әлем және құрлық чемпионаттарының қола жүлдегері, грузиялық Мириан Майсурадзені 8:1 есебімен атойлап жеңді. Сөйтіп, Ризабек Айтмұхан финалға шықса, Мей­рамбек Қартбай қола медаль үшін таласады. Ал Нұрқожа Қай­панов пен Болат Сақаев жұ­баныш белдесулерде бақ сынайды.

Ал бұл салмақ дәреже­ле­ріндегі финалдық сайыстар мына еркін күрес шеберлері арасында өтеді: 57 кило: Рей Хигучи (Жа­пония) – Стеван Мичич (Сер­бия), 74 кило: Заурбек Си­даков (Ресей) – Кайл Дейк (АҚШ), 79 кило: Ахмед Усманов (Ресей) – Владимир Гамкрелидзе (Гру­зия) және 92 кило. Ал Ризабек Айт­мұхан (Қазақстан) мен Осман Нурмагомедов (Әзербайжан) арасындағы финалдық бел­де­судің жеңімпазы – қазақ балуаны. Ол хабар бөлек беріліп отыр.