Жаңа кабинет түркология мен түрік тілін үйренуге қажетті материалдық-техникалық базамен, электронды және баспа оқу құралдарымен, заманауи электронды мультимедиялық тақтамен жабдықталған.
«Түрік тілі мен мәдениеті» аудиториясының ашылуына Л.Н.Гумилев атындағы ЕҰУ ректоры Ерлан Сыдықов, Түркияның Қазақстандағы Төтенше және өкілетті елшісі Мұстафа Капуджу, Түрік ынтымақтастық және үйлестіру агенттігінің президенті Хикмет Узденоғлы, университеттің халықаралық қатынастар факультеті түркология кафедрасы оқытушылары мен студенттері қатысты. Кездесу барысында Е.Сыдықов ЕҰУ Түркияның 35-тен аса жетекші университетімен белсенді ынтымақтастық орнатқанын, ондаған студент ЕҰУ-да білім алып жатқанын атап өтті. Еліміздің жастары академиялық ұтқырлық бағдарламалары аясында Түркия университеттерінде білімдерін кеңейтуге мүмкіндік алды.
«Ынтымақтастық мамандарды бірлесіп даярлау шеңберінде ғана емес, сонымен қатар елдеріміздің студенттері мен оқытушылары үшін академиялық ұтқырлық және тағылымдама бағдарламалары аясында да дамып отыр. Бұл кабинет Түркия мен Қазақстанды біріктіретін тағы бір алтын көпір болмақ. Осы аудитория негізінде түркітану саласындағы мамандарды даярлау күшейтіледі. Бұл кабинет екі елдің мәдениеті мен дәстүрлерін біріктіру орталығы болатынына сенімдімін. Университет ұжымы Түркия елшілігіне және Түрік ынтымақтастық және үйлестіру агенттігіне кабинетті жабдықтағаны үшін алғыс білдіреді», деді Е.Сыдықов.
Жаңа оқу кабинеті ЕҰУ-дың түркітану кафедрасына қарайды. Бұл кафедра 2010 жылдан бері бакалавриат, магистратура және докторантура деңгейінде 400-ге жуық маман даярлады. Қазіргі таңда 3 білім беру бағдарламасы бойынша 100-ден аса студент оқып жатыр.
Студенттерге арналған жаңа кабинет Түркияның Қазақстандағы елшілігі мен Түрік ынтымақтастық және үйлестіру агенттігінің (TIKA) қолдауымен ашылды.
«Біз бұл кабинетті түрік халқы, түрік жастары мен қазақ бауырларымыздың қарым-қатынасын одан әрі жақсартатын жоба ретінде қарастырамыз. Бұл аудитория үнемі студенттерге толы болады және студенттер түрік тілін өте жақсы меңгереді деп ойлаймын. Оларға жаңа мүмкіндіктер ашылады. Әртүрлі түрік фирмасында жұмыс істеп, Түркияда магистратурада оқуға мүмкіндік туады. Ең бастысы, жастар елдерімізді біріктіріп, Қазақстан мен Түркия арасындағы қарым-қатынастың дамуына маңызды үлес қосады», деді Түркия елшісі М.Капуджу.
Түрік ынтымақтастық және үйлестіру агенттігінің президенті Хикмет Узденоғлы тіл адамдар арасындағы қарым-қатынасты қалыптастыратын көпір екенін атап өтті. Оның айтуынша, аудиторияның ашылуы ынтымақтастық көкжиегін кеңейтуге мүмкіндік береді.
