Тотыдай түрленген шағын шаһар жыл санап жанданып келеді. Жаңа шағын аудандар қосылып, көз тартар зәулім үйлер бой көтеріп, жастардың талабына сай дамып келеді. Бұрын Талдықорғанды зейнеткерлердің қаласы деп атайтын еді, ал қазір бұл ұғым бара-бара ұмытылып бара жатқандай. Жан-жақтан білім іздеген жастар келіп, қаланың келбетін одан әрі сәндеуде. Жаңа өңірдің тарихы осылай жазылып жатыр. Қазір облыс орталығына жақын аудандар мен ауылдық округтерге бірте-бірте табиғи газ тартылып, халықтың тұрмысы түзеліп келеді. Соның бірі – «Үйтас» саяжайы. Көбіне көпбалалы ата-аналар тұратын аумаққа көгілдір отын ауадай қажет еді. Себебі тұрғындар қыста көп отын жағатынын, көмірден тапшылық тартатынын айтып, әкімдікке талай өтініш жолдаған. Бүгін, міне, мақсатына жетті. Енді мұндағы 4200-ден астам тұрғынның немесе 1500-ден астам абоненттің газға қосылуға мүмкіндігі бар.
Өңір әкімі баспасөз қызметінің мәліметінше, бұл тұрғын алабын газдандыру жобасы 2020 жылы басталған. Оған 388 млн теңгеден астам қаржы бөлініп, 43 км газ желілері салынды. Қазір қала іргесіндегі саяжайларды толық газбен қамтамасыз ету жұмыстары жүріп жатыр. Алдағы уақытта тұрғындар біртіндеп табиғи газға толық қол жеткізеді. Осы бір мерекелі мезетте облыс әкімі Бейбіт Исабаев тұрғындарды қуаныштарымен құттықтады.
«Ел Президенті мемлекеттік саясаттың оң нәтижелерін бірінші кезекте халық сезінуге тиіс екенін ұдайы айтып келеді. Өйткені жүргізіліп жатқан реформалардың бәрі де әлеуметтік жағдайды жақсартуға, азаматтардың әл-ауқатын арттыруға бағытталып отыр. Халыққа ең алдымен сапалы жол, жарық, газ, мектептер мен балабақшалар, лайықты жалақысы бар жұмыс керек. Сондықтан біз өңірдің инфрақұрылымын дамытуға, елді мекендерді, оның ішінде саяжай қауымдастықтарын абаттандыруға ерекше назар аударып келеміз. Бұдан бірнеше жыл бұрын бұл тұрғын үй массивіне жарық пен су тартылып, көше жарығы орнатылған, енді міне, газ келді, жолдарыңыз да жөнделіп жатыр. Көгілдір отынмен бірге үйлеріңізге жылу ұяласын. Енді газ желісіне белсенді қосыласыздар деп сенемін», деді Б.Исабаев.
Сондай-ақ ол биыл «Жастар-2», «Ынтымақ» жеке тұрғын алаптарындағы 11,5 мың тұрғын, сондай-ақ Талдықорған қаласындағы қалған учаскелердің 585 тұрғыны газға қол жеткізетінін айтты. Ал 2024 жылы Мойнақ ауылында газ желілерін салу жұмыстарын аяқтау жоспарланып отыр.
«Президент біздің облысқа өткен жылғы сапары кезінде берген тапсырмасына сәйкес 2025 жылға дейін Кербұлақ ауданынан Талдықорғанға дейінгі елді мекендерді толық газдандыруды жоспарлап отырмыз, ал 2030 жылға қарай өңірді газдандыру 100 пайызға жетеді немесе 192 елді мекенді қамтимыз. Біз өңірдің инфрақұрылымын дамыту жұмыстарын бұдан әрі де жалғастырамыз», деді Б.Исабаев.
«Үйтас» саяжай қауымдастығының төрағасы Людмила Хадисова тұрғындардың атынан алғыс айтты. Мұнан соң салтанатты түрде газ қосу рәсімі атқарылды. Мәселен, «Үйтас» саяжай алабының алғашқы газ тұтынушыларының бірі, алты баланы жалғыз тәрбиелеп отырған көпбалалы ана Әсия Чукубасованың үйі әлеуметтік қолдау ретінде газға тегін қосылды. Бұл – қала әкімдігінің, «ҚазТрансГазАймақ» өндірістік филиалының, «ЖетісуГазСервис» МКК және «ТаразСтрой 2004» ЖШС мердігер ұйымының бірлескен жұмысының нәтижесі.
Тұрғындармен әңгімелесу барысында облыс әкімі Бейбіт Исабаев қабылдауға әр уақытта орта есеппен 14-15 адам келетінін, олардың көтерген мәселелерінің шамамен 80 пайызы оң шешілетінін атап өтті. Соның ішінде мемлекеттік қордан тұрғын үй беру мәселелері бойынша жүгінетіндер де көп.
«Тұрғын үй мәселесі – бірінші кезектегі мәселе. Десек те заңға қайшы әрекет етіп, кезексіз тұрғын үй беруге болмайды. Бірақ шұғыл көмек қажет болатын кездер болады, адамның материалдық жағдайы, денсаулық жағдайы, бірқатар әлеуметтік мәселелері ауыр болуы мүмкін. Сондықтан біз мұндай жандардың тұрғын үй жағдайларын жақсартып алғанға дейін оларға бос орындары бар студенттік жатақханалардан отбасы мүшелерінің санына қарай 1-3 бөлме бөлген жөн деп шештік. Жатақханаларды күрделі жөндеуден өткізгеннен кейін отбасылар үшін бөлек кіреберіс қарастырылады. Қазір жаңа жатақханалар салу кезінде де осындай жағдайларды бірден ескеруді көздеп отырмыз. Жалпы, биыл Талдықорғанда жалгерлік тұрғын үйдің рекордтық көлемі пайдалануға беріледі. Яғни кезекте тұрған 2 мың адамға пәтер беріледі. Қазір 2009-2010 жылдары кезекте тұрғандар ала бастады», деді Б.Исабаев.
Бүгінде жаңа 9-шағын ауданда тұрғын үйлер құрылысы жүріп жатыр. Егер жыл сайын биылғыдай 300 мың шаршы метрден астам тұрғын үйді іске қосатын болса, онда алдағы 4-6 жылда кезекте тұрғандар саны екі есеге қысқармақ. Сонда кезектегі азаматтар қазіргідей 10-20 жылдан кейін емес, әрі кетсе 5-6 жыл ішінде тұрғын үйге қол жеткізетін болады. Осы мақсатта өңір ішінде тиісті шараларды қабылдап жатыр.
Атап өтсек, бүгінде 8 саяжай массивін – «Қаратал», «Қызылтас», «Мереке», «Балықты», «Сарыбұлақ», «Алмалы», «Ащыбұлақ», «1-бөлімше» тұрғын алаптарын газдандыру үшін ЖСҚ әзірленіп жатыр. Жобалық жұмыстардың аяқталу мерзімі – 2024 жылғы қаңтар-ақпан. Сондай-ақ Жетісу облысын толық газдандыру жұмыстары жалғасуда.
Жалпы, қала күні аясында Талдықорған қаласындағы ипподромда таңертеңнен бері ұлттық ат спорты түрлерінен жарыстар өткізді. Оқушылар сарайының жанындағы алаңда «Kinder fest» балалар фестивалі ұйымдастырылды. Оның аясында қала кәсіпорындарының бірі балаларға салмағы 25 кг 1,5 метрлік тәтті торт тарту етті. Мерекеде жаңа қонысқа кіргендер де бар. 25 көпбалалы отбасына «Береке» коттедж қалашығындағы үйлердің кілттері табысталды. Ал кешке «Жастар» саябағында отандық эстрада әншілерінің қатысуымен концерттік бағдарлама ұйымдастырылады.
Жетісу облысы
