Елордамызда 3 қазанда Шуша күндеріне арналған мерекелік кеш өтті. Кеште қаланың тарихи һәм рухани маңызына назар аударылып, әзербайжан мәдениеті жөнінде сөз қозғалды. Іс-шараға халықаралық түркі қорларының қызметкерлері, ТҮРКСОЙ ұйымы, Қазақстандағы Түркия, Әзербайжан, Мажарстан елшіліктерінің өкілдері қатысты.
Мерекелік кеште сөз алған Мәдениет және ақпарат министрлігі Мәдениет комитетінің төрағасы Күміс Сейітова Шуша қаласының мәдени келбетіне тоқталды.
– Біз түркі әлемінің мәдени астанасы Шуша қаласының елордамыздағы күндерінде бас қосып отырмыз. Шуша әу бастан Әзербайжанның мәдени-қоғамдық саяси өмірінің маңызды орталықтарының бірі, ислам өркениетінің рәмізі. Онда Мұртаза Мамедов, Натаван Хуршидбану секілді өнер саңлақтары дүниеге келген. Бауырлас қазақ-әзербайжан арасындағы мәдени ынтамақтастық байланыс күн санап нығайып келеді, – деді ол.
Сонымен бірге Халықаралық Түркі мәдениеті мен мұрасы қорының президенті Гюнай Эфендиева түркі бірлігін нығайтуға арналған мерекенің келелі тұсын атап өтті.
– Былтыр Түркі мәдениеті мен мұрасының халықаралық қоры атынан Шуша күндерінің өтуі туралы ұсынысымызды білдірген болатынбыз. Мерекелік іс-шара Бурсадан бастау алып, Ташкентте жалғасын тапты. Міне, бүгін Астана қаласында өткеніне куә болып отырмыз. Біршама күннен соң Шуша күндері Түрікменстанда жалғаспақ, мұндай іс-шаралар түркі әлемінің арасын жақындатып, халықтарды біріктіре түседі, – деді ол.
Мерекелік кеште танымал ұлттық киімдері топтамасы көрсетіліп, көрермен көзайымына айналды. Ұлттық нақышты киім үлгілерінде Әзербайжанның бай тарихи мұрасы мен жаңа үлгідегі әшекейлері көрініс тапқан. Мұнан соң түркі елдері өнерпаздарынан құралған «Жеті сұлу» тобы өнерлерін көрсетіп, Абайдың «Көзімнің қарасы» әнін орындады.
Жиынға Сенат депутаты Дархан Қыдырәлі, Түркияның Қазақстандағы Төтенше және өкілетті елшісі Мұстафа Капуджу, Әзербайжан Республикасының Қазақстандағы Төтенше және өкілетті елшісі Аталар Атамогланов, басқа да зиялы қауым өкілдері қатысты.
Мерекелік шара аясында Шуша қаласының тұмса табиғаты мен тарихи келбеті, бүгінгі айбынды бедері бейнеленген суреттер көрмесі таныстырылды.
