Қазақ оркестрі – Астана филармониясының 1996 жылы құрылған шығармашылық ұжымы. 2008 жылдан бастап оркестрдің көркемдік жетекшісі әрі бас дирижері – Қазақстанның еңбек сіңірген қайраткері, «Парасат» орденінің иегері Айтқали Жайымов.
«Астана – өнер ордасы» бағдарламасында маэстро Айтқали Жайымов пен оркестр дирижері, Мәдениет қайраткері Нұрлан Бекеновтің жетекшілігімен Түркештің «Көңілашар», Тәттімбеттің «Саржайлау», Дина Нұрпейісованың «Әсемқоңыр», Құрманғазының «Сарыарқа», «Серпер», Жанар Жүсіпованың «Тұран», Айтбай Мұздахановтың «Аманкелді дүбірі», Нұрлан Бекеновтің «Мұқали» шығармаларының оркестрлік өңдеулері орындалды. Сонымен қатар көрермен Жорж Бизенің «Кармен» және Вольфганг Амадей Моцарттың «Фигароның үйлену тойы» операларынан ұлттық аспаптар оркестріне арналған увертюраларды тыңдай алды.
Виртуоз музыканттар да өз кәсібилігін көрсете алды. Анар Мұздаханова Нұрғиса Тілендиевтің «Аққу» күйін ұсынса, Жанар Жүсіпова «Ықылас» күйін шеберлікпен шертті. Сондай-ақ оркестрмен бірге Ботагөз Тәшімова Еділ Құсайыновтың «Қыпшақ жыры» шығармасын ұсынды. Айтқали Жайымовтың «Отпан тау» күйін халықаралық байқаулардың лауреаты Қайрат Жұмағалиев орындады.
Осы кеште филармонияның академиялық вокал бөлімінің әртістері де сахнаға шықты. Талғат Аллабиринов оркестрмен бірге Абайдың «Айттым сәлем, Қаламқас» және Ди Капуаның «O, sole mio» әндерін шырқады. Ал Алтынбек Әбілда Сыдық Мұхамеджановтың «Айсұлу» операсынан Серке каватинасы мен Еркеғали Рахмадиевтің «Бала ғашық» туындысын паш етті. Халықаралық байқаулардың лауреаты Фируза Рахметова Қазақ оркестрімен бірге Луиджи Ардитидің «Поцелуем» және Латиф Хамидидің «Бұлбұл» шығармаларын орындап, ерекше әсер қалдырды. Кеш соңында орындаушылар Арман Жайымның «Қазақ елі» және Ермұрат Үсеновтің «Астана» әндерімен концерттік бағдарламаны аяқтады.
