Биыл Тарас Шевченко атындағы халықаралық сыйлық әлем әдебиетіне қосқан зор үлесі және Украина әдебиетін Қазақстанда айтарлықтай танымал еткені үшін жазушы Роллан Сейсенбаевқа берілді. Украинаның Халықаралық әдебиет және өнер академиясы белгілеген бұл құрметті сыйлық көрнекті жазушыларға, журналистерге, аудармашыларға, ғалымдарға, өнер қайраткерлеріне, мемлекет және қоғам қайраткерлеріне жанқиярлық, қоғамдық және қайырымдылық қызметтері үшін беріледі.
Автордың «Өзімді іздеп жүрмін», «Шайтанның тағы», «Ешқайда бастамайтын баспалдақтар», «Өмір сүргің келсе», «Қазыбектің оралуы», «Түнгі диалог», «Құм кезген өліктер», тағы басқа прозалық, драматургиялық туындылары оқырманға жақсы таныс. Роллан Сейсенбаев қаламгер, аудармашы, баспагер ғана емес, белсенді қоғам қайраткері екенін де білеміз. Ол Лондонның төрінен Абай үйін, Халықаралық Абай клубын және «Аманат» халықаралық әдеби журналын ашты.
Роллан Сейсенбаевтың әдебиетке сіңірген еңбегін халықаралық деңгейде мойындау оның шығармаларында гуманизм, бейбітшілік, ізгілік, әділдік, жалпыадамзаттық құндылықтар тақырыптарын көтеруімен байланысты болса керек. Қазақ жазушысымен бірге биыл Тарас Шевченко атындағы сыйлықтың лауреаттары тізімінде Украинаның халық ақыны Василий Симоненко, сондай-ақ украин ақындары мен аудармашылары Василий Барка мен Богдан Бойчук та бар.
Жазушы қайраткерлік еңбегі үшін бұған дейін де бірнеше рет жоғары халықаралық марапатқа ие болды. Былтыр Халықаралық өнер орталығы «Radius» (АҚШ), Халықаралық өнер орталығы «Pegasus Brucke», сонымен бірге он мемлекеттің халықаралық қоғамдық ұйымдары Роллан Сейсенбаевқа «Әлемнің алтын жазушысы» атағын табыс етті. Бұл жоғары атақ жазушылардың еңбектері мен қуатты шығармашылық ұмтылыстары үшін тағайындалған. Еске салсақ, америкалық «Amazon Crossing» баспасынан автордың «Құм кезген өліктер» роман-эпосы жарық көрген болатын.
