Әлемде техногендік апаттар көбейген сайын төтенше жағдай қызметкерлерінің де қадірі артып барады. Ала жаздай далада жиі тұтанатын алапат өрт, суға түсу кезіндегі жазатайым оқиғалар, қыстың үскірік аязында жолда қалатын жолаушыларды қоссаңыз, елімізде төтенше жағдай қызметкерлеріне түскен салмақтың қаншалықты ауыр екенін көресіз.
Адам өмірін құтқару минутпен емес, секундпен өлшенген сәттерде құтқарушының ептілігі, ширақтығы, жағдайды тез таразылай білуі, спорттық дайындығы, шыдамдылығы сынға түседі. Төтенше жағдай кезінде құтқарушының қызметіне адалдығы мен жеке басының қасиеттері бір-бірімен астасып жатады. Азаматтық қорғау қызметінің старшинасы Әскербек Құлбарақов – осындай жігіттердің бірі. Оның төтенше жағдай қызметіндегі еңбек өтілі – 17 жыл. Әскерден кейін еңбек жолын өрт сөндіруші болып бастап, содан бері қаншама қиындық сәттерге тап келсе де, өз мамандығынан бас тартқан емес.
Ақтөбеде өрт кезінде өз басын қатерге тігіп, бірнеше адамды алып шыққан құтқарушының ерлігін ақтөбеліктер жақсы біледі. 2011 жылы Ақтөбе қаласының Әбілқайыр көшесі бойындағы 9 қабатты тұрғын үйде өрт тұтанып, одан үйдің пластикпен қоршалған қабырғалары жанған кезде Әскербек жеделсатымен көтеріліп, бірден 9 адамды алып шықты. 2021 жылы қаладағы көппәтерлі үйден шыққан тағы бір өрт кезінде ол алты бала мен бір қарт кісіні алып шықты.
Әскербек 2011 жылы «Төтенше жағдайдағы ерлігі үшін» медалімен, 2020 жылы «Ерлігі үшін» медалімен марапатталды. «Үздік қорғаушы» атағын да иеленді. Отбасында үлгілі әке. Оның еңбек жолы – балалары мен туыстарына үлгі. Қолы бос кезінде спортпен айналысады. Соның ішінде қысқы спорт түрлерін ұнатады. Әскербек өзі бас болып шайбалы хоккей командасын ұйымдастырып, оған жас жеткіншектерді тартып өнеге көрсетіп жүр. Бейбіт күннің батыры Әскербек – міне, осындай азамат.
Ақтөбе облысы
