Тайпақ – ежелден әлемге әйгілі спортшылар көп шыққан өңір. Самбодан төрт дүркін әлем чемпионы Ерболат Байбатыров, грэпплингтен халықаралық дәрежедегі спорт шебері, әлем чемпионы Зайреден Мұхамбетжанов, қол күресінен Қазақстан спорт шебері, жастар арасында әлем чемпионы Кенжеқыз Қаупенова, бокстан Азия чемпионатының күміс жүлдегері Даниал Сәбит, қол күресінен Азия кубогінің жеңімпазы Ізбасар Нұрбол, әлем чемпионатының күміс жүлдегері Болатбек Райымқұлов, самбодан әлем чемпионатының жүлдегері Бағдат Жарылғасов, самбодан жастар арасында әлем чемпионатының күміс жүлдегері Армат Қабдолов т.б. майталмандар шыққан өңірде ашылған су жаңа 160 орындық денешынықтыру-сауықтыру кешені «Қарашығанақ Петролиум Оперейтинг Б.В» компаниясы есебінен бөлінген қаражатқа тұрғызылған.
– Мемлекет басшысының тапсырмасын орындау аясында облыста 11 денешынықтыру-сауықтыру кешені қолданысқа берілсе, бүгін су жаңа ғимарат Тайпақ
ауылында ашылып отыр. Енді жас спортшылар заманауи спорт кешенінде жаттығып, кәсіби шеберлігін шыңдап, әлемдік сайыстарда жоғары жетістікке қол жеткізіп, ел үмітін ақтайды деп сенеміз. Жаңа спорттық нысан ел атын мәшһүр еткен аға буын спортшылар салып кеткен сара жолды жалғар чемпиондар ұстаханасына айналсын, – деді кешеннің ашылуына арнайы қатысқан Батыс Қазақстан облысының әкімі Нариман Төреғалиев.
Ал Ақжайық ауданының орталығы Чапаев ауылында ашылған спорт кешені 320 адамға арналған. Кешеннің бірінші қабатында ауыр атлетика бөлмесі, бокс рингі, арбадағы мүгедектерге арналған орындар болса, екінші қабатында күрес залы мен дойбы, шахмат, тоғызқұмалақ ойнайтын бөлме бар. Спорттық нысанда халықтың спортпен шұғылдануы үшін барлық жағдай жасалған. Өңір басшысы «спорт кешені әр тұрғын үшін қолжетімді болады» деп мәлімдеді.
Батыс Қазақстан облысы
