Үш ауданнан тоғыз үміткер шықты. Облыстық аумақтық сайлау комиссиясы төрағасы Нұрлыбек Жүсіповтің хабарлауынша, жергілікті уақытпен 18.00-де үш ауданда тіркелген сайлаушылардың 65 пайызы 79 сайлау учаскесінде дауыс беріп үлгерген. «Сайлау учаскелерінде ешқандай да заң бұзушылық тіркелген жоқ. Бәрі заң аясында өтті, жұртшылық өздері таңдаған үміткерге дауыс берді», дейді Н.Жүсіпов.
Аудан әкімі болуға талпынған тоғыз үміткердің үшеуі саяси партиялардан, ал алтауы өзін-өзі ұсынған. Үміткерлердің жасы 38-де болса, ең үлкені 61 жаста.
Қобда ауданында өткен сайлауда Бағдат Амантаев – 1 599, Бауыржан Мұсаев – 891, ал Ізгілік Тынымгереев сайлаушылардың 4 672 дауысына ие болды. Ауданда 38 тұрғын бюллетеннің «Барлығына қарсымын» деген бөлігін белгілеген. Ал Ойылда сайлаушылардың 943-і Арсланбек Алдиярға өз дауысын берген. Асқар Қазыбаевқа – 3 742, Айбек Сұлтановқа 2 154 дауыс берілді. «Барлығына қарсы» белгісі бар бюллетеньдер саны – 140.
Сондай-ақ Ырғыз ауданында Нүркен Жұбаназаров – 1 091, Нұрлан Қызбергенов – 3 819, Альбек Таубатыров 1397 дауысқа ие болды. Барлығына қарсы болғандар – 62 адам.
Сайлау қорытындысы бойынша, Ізгілік Тынымгереев – Қобда, Асқар Қазыбаев – Ойыл, Нұрлан Қызбергенов Ырғыз ауданының әкімдері болып сайланды. Соңғы екі үміткер бұған дейін де сол аудандарда әкім қызметін атқарып келген.
Ақтөбе облысы
