Ортопедия саласының танымал маманы Мирамбек Жұмағұловтың жетекшілігімен, Мәскеудегі Приоров атындағы Ғылыми-медициналық зерттеу орталығы маманы Алексей Шумскийдің қатысуымен алғаш рет елімізде жалпы тізе мен жамбас буындарын эндопротездеу, сондай-ақ тізе буынын бір айдаршықты протездейтін алғашқы операциялар жасалды. Роботтың көмегіне жүгінген кезде әрбір науқасқа жеке емдеу тәсілі сақталып, робот операцияға дейін жасанды буынның дәл 3D-жоспары мен импланттың дұрыс өлшемін жасап, оны орнататын орынды тура таңдайды.
«3-7 қараша аралығында біз эндопротездеуге мұқтаж 9 науқасты таңдап, елімізде роботтың көмегімен тізе және жамбас буындарын ауыстырудың алғашқы операцияларын жасадық. Үміткерлерді іріктеу бірнеше ай бойы ыждағаттылықпен жүргізілді. Дәрігерлер консилиумы өтіп, жасанды буынды дәл 3D-жоспарлау үшін КТ зерттеудің цифрлық нәтижелері АҚШ мамандарына жіберілді. Роботтың арқасында операция алдын ала жоспарланғандай – 1 мм-ден де кем қателікпен жүзеге асырылады. Сондай-ақ жұмсақ тіндердің сақталуы барынша қамтамасыз етіліп, байлам аппаратының оңтайлы тепе-теңдігіне қол жеткізіледі», дейді Алматы №4 ҚКА хирургия бөлімшесінің меңгерушісі М.Жұмағұлов.
Осы арада «Stryker» компаниясы ұсынған Mako технологиясы дәлірек әрі болжамды хирургиялық нәтиже беріп, науқастың денсаулығын тез қалпына келтіріп, протездің де мерзімін ұзарта алатынына тоқтала кеткен жөн. Mako технологиясымен бір айдаршықты эндопротез жасатқан науқастар оның зақымы аз екенін, қалпына оралу мүмкіндігі тез және жасанды протезді өз буынындай сезінгендерін айтады.
«Бүгінде мұндай технология дамыған елдерде танымал, мұны АҚШ, Канада, Жапония, Кореяның жетекші клиникалары қолданып келеді. Алматы қаласы әкімдігінің қолдауымен біз Қазақстанда роботтың көмегімен алғашқы тізе және жамбас буындарын ауыстыру операцияларын жасадық. Бұл – инновациялық ортопедия үшін әрі травматологиялық-ортопедиялық көмекті жетілдірудің жаңа кезеңі. Жыл сайын мұндай операцияны қажет ететін науқастар саны артып келеді. Мәселен, осы жылдың 10 айында біздің ауруханада 1,5 мыңнан аса буын ауыстыру операциясы жасалса, ендігі мақсатымыз – қызметімізді жетілдіріп, сапалы медициналық көмек көрсету», дейді Алматыдағы №4 ҚКА директоры, медицина ғылымдарының кандидаты, MBA, DBA профессоры Біржан Досмаилов.
Айтқандай, 2012 жылы осы ауруханада жамбас, тізе, иық, шынтақ буындарын, сонымен қатар аяқ-қолдың ірі буындарындағы эндопротезді толық және жартылай ауыстыруды жүзеге асыратын мамандандырылған эндопротездеу бөлімшесі ашылғанын айта кету керек. Ауруханадағы эндопротездеу тәжірибесі 1975 жылы Анатолий Чучуло №4 ҚКА-да жамбас буынын бір полюсті эндопротездеу операциясын жасаған кезден бастау алады. Осы жылдар ішінде 20 мыңнан аса пациентке буын ауыстыру операциялары жасалған.
АЛМАТЫ
