![Әдепсіз әкім қайдан шығады?](/media/2023/11/09/2022_07_29_103937-900x_-1000x_.webp)
Сауда орнындағы бейнебақылау құрылғысы әкімнің: «Менің артымда тұрған адамды көріп тұрсың ба? Тобыл әкімінің орынбасары. Маған оның телефон нөмірін берші (Дүкен иесінің байланыс нөмірін сұраса керек). Алты-ақ секундта құртамын оны. Бәрін құртамын! Менің мүмкіндіктерімді білмейсің сен! Менің кім екенімді білесің бе?», деп әкіреңдеп тұрған сәтін жазып алған. Камерада одан кейін дүкеншінің әкімге ішімдік сатқаны, әкімнің дүкеншінің алдына шиырып ақша лақтырғаны, қайтқан тиын-тебенін қалтасына салып жатып, түсініксіз тағы бірдеңе айтқаны, сатушының «Менімен бұлай дөрекі сөйлеспеңіз!» деген сөздері сақталған.
Аталған департаментке қарасты мемлекеттік қызмет саласындағы бақылау басқармасының басшысы Азамат Байтұрсынов қызметтік тексеріс барысында М.Таймасовтың өз айыбын мойындап, шын өкініш білдіргенін, ал дүкен директорының келеңсіз оқиғаға қатысты қандай да бір түсінік беруден бас тартқанын мәлімдеді.
– Заң тыйым салған уақытқа қарамастан, М.Таймасов ішімдік сатып алуға тырысқан. Бұл келеңсіз оқиға әлеуметтік желі арқылы бүкіл елге тарап кетті. Сатушы арақ беруден бас тартқан. Ал аузынан ақ ит кіріп, көк ит шыққан әкім қоқан-лоқы көрсетіп, дүкен иесіне қоңырау шалған. Осыдан кейін әлеуметтік желіде мемлекеттік аппараттың беделіне нұқсан келтіретін пікірлер көбейді, – деді А.Байтұрсынов.
Мақаш Таймасовтың мемлекеттік қызмет саласында жүргеніне 5 жыл 6 ай болыпты. 2022 жылдың 20 ақпанында Новоильин ауылдық округінің әкімі болып сайланған. Бұрын-соңды тәртіптік жазаға тартылмаған, өзіне сеніп тапсырылған міндетін де жақсы атқарып келген көрінеді.
«Дүкенге 18 қазанда бардым. Ішімдік сатып алғым келген. Бірақ сағатқа қарамаппын. Мені бұрынан жақтырмай жүрген сатушымен жанжалдасып қалдым. Ол менің өтінішіме дөрекі жауап қатты, сол сәтте өз-өзіме ие бола алмай қалып, балағат сөз айтып қойдым. Дүкенге кірмей тұрып, көліктің ішінде әйеліммен ұрсысып қалып, көңіл күйім болмай тұрған. Бұл әрекетіме шын өкініп, кешірім сұраймын. Бұрын-соңды мұндай жағымсыз қылық жасап көрген емеспін. Сондықтан кеңес мүшелері, әділ шешім шығарарсыздар деген үміттемін», деді М.Таймасов.
Ауыл әкімі бұған дейін сот бейнежазбаны қарап шыққан соң, сатушының дөрекі жауабын ескеріп, өзіне салынған әкімшілік айыппұл мөлшерін азайтқанын айтты.
Кеңес мүшелері әкімнің дүкенші әйел өзін қалай жәбірлегенін, қай сөзі жанына тиіп кеткенін нақтылап айтып беруін сұраған еді, М.Таймасов: «Мүмкін оның үзілді-кесілді «Жоқ» дегені дәл сол кезде маған жәбірлеп тұрған сияқты болып көрінген шығар», деп жауап берді.
– Мені әкімнің өз айыбын сатушының дөрекі сөзі арқылы ақтап алғысы келіп тұрғаны таңғалдырады. Шынайы өкініп тұрған адамды көріп тұрған жоқпын. Тек ақталу үшін бар айыпты басқаға жабуға тырысып жатыр. Бейнежазбаны бірнеше рет бастан-аяқ қарап шықтым. Дүкеншінің дөрекі сөйлегенін байқамадым. Қайта ол өз-өзін сабырға жеңдіріп, байыпты ұстап тұр. Ал Таймасовтың көңілді екені, серігімен бірге күлгені анық байқалады. Әйеліммен ұрсысып қалып едім деген жай ойдан шығарылған сылтау деп есептеймін. Сондықтан әкімге ең қатал шара қолдану керек, – деді кеңес мүшесі Асқар Жабаев.
Тәртіптік отырысқа қатысқандардың дені осыған ұқсас пікір айтты. Нәтижесінде, Әдеп кеңесінің мүшелері бірауыздан ауылдық округ әкімін лауазымынан босату туралы шешім шығарды.
Қостанай облысы