Вице-министрдің айтуынша, қаржыны игермеудің негізгі себебі − конкурстық рәсімдерді ұзақ мерзімде өткізу, өнім берушілердің тауарларды уақтылы не толық жеткізбеуі, бюджеттік бағдарламаларды (кіші бағдарламаларды) іске асыру жөнінде нормативтік құқықтық актілерді уақтылы қабылдамау, шот-фактуралар, атқарылған жұмыс актілерінің дер кезінде ұсынылмауы.
«Жергілікті бюджеттің шығыстары 10 трлн теңгені құрады. Атқарылмағаны - 294 млрд теңге. Биыл өңірлерге 2 трлн теңгеге жуық нысаналы трансферттер көзделген. Оларға 1 қарашаға 1 трлн 261 млрд теңге бөлінген. Оның 94,4 пайызы игерілген. Атқарылмағаны – 71 млрд теңге, оның ішінде 2 млрд теңге – үнемделген қаржы құрамына кіріп отыр. 69 млрд теңге игерілмеген. Ең көп бюджет қаржысын игермеген Астана және Алматы қалалары, Маңғыстау және Ақмола облыстары», деді ол.
Ал, министрліктер бойынша қаржыны игермеудің ірі сомалары Ішкі істер, Мәдениет және ақпарат, Су ресурстары және ирригация, Экология және табиғи ресурстар министрліктерінде қалыптасқан.
«Мемлекеттік бюджеттің шығыстары - 98,2, республикалық бюджеттің шығыстары – 99,4, жергілікті бюджеттердің шығыстары 97,2 пайызға орындалды. Республикалық бюджет бойынша сомасы 18 трлн теңгеге шығыстар жүргізілді. Атқарылмау 107 млрд теңгені құраса, оның ішінде, үнемдеу 16 млрд теңге болды. Игерілмегені – 91 млрд теңге», деді Қаржы вице-министрі Дәурен Темірбеков.
