Табиғаты тамылжыған өлке қуанышқа кілкіп тұр. Өмірге жиырма миллионыншы сәби келді. Нәрестенің анасы Динара – мұғалім, ал әкесі Айдар Исенов энергетика саласында еңбек етеді. Түтіні түзу ұшқан шаңырақ. Дәрігерлердің айтуларына қарағанда, өмірге келген сәбидің де, құшағы гүлге толған жас ананың да денсаулығы жақсы.
Облыс әкімі Марат Ахметжанов ел Президентінің атынан кішкентайлы болған отбасын құттықтай келіпті.
«Біз бүгін тарихи сәттің куәсі болып отырмыз. Мерейлі сәбидің біздің облыста, оның ішінде жер жәннаты Бурабайда өмірге келуі – ерекше сый. Мемлекет денсаулық сақтау, білім салаларына көп көңіл бөліп отыр. Біздің жастарымыз заман талабына сай жақсы білім алып, өсіп-жетілуі керек», деді облыс әкімі.
Ақ түйенің қарны жарылған қуанышқа ортақтасып, әріптестері, ет жақын туыстары, көрші-қолаң шашу шашып, бөбектің бауы берік болсын деген тілектерін айтып жатыр.
«Біздің отбасы үшін бір жағынан күтпеген қуанышты күн болды, – дейді отағасы Айдар Исенов. – Бұл екінші баламыз. Бауыр еті баламыздың бақытты болып өскенін қалаймыз. Өмірге келген әр баланың бақытты болуға хақы бар».
Қазіргі уақытта жас ана мен сәби «Авиценна-Бурабай» серіктестігінің ана мен бала бөлімшесінде. Сөз арасында жыл басынан бері өңірде 9 604 нәрестенің өмірге келгендігін айта кетелік.
Жас отбасының осы бір бақытты сәтіне куәгер болған тілектес қауым жарық дүние есігін жаңа ғана ашқан нәрестеге ұзақ ғұмыр тілеп тарасты. Біз де өз тарапымыздан өмірің ұзақ, бақытың үстем болсын деген тілегімізді айттық. Жүз жаса, еліміздің жиырма миллионыншы нәрестесі!
Ақмола облысы,
Бурабай ауданы
