«Аталған байқаудың мақсаты – жас ұрпақты қазақ халқының тарихи-мәдени мұрасын құрметтеуге үйрету, балаларды батылдыққа, төзімділікке тәрбиелеу. Аталған жоба шеңберінде жыл бойы түрлі челлендждер, жарыстар, байқаулар өткізіліп жатыр. Бүгінгі олимпиада – осы кешенді іс-шаралардың жалғасы десек болады», дейді Білім басқармасына қарасты Өңірлік денешынықтыру және балалар мен жасөспірімдер туризмі орталығы директорының орынбасары Наталья Рябченко.
Сақасын иіріп, шиырып асық атып, ойын қызығына түскен балалардың ішінде түрлі ұлт өкілдері де баршылық. Іс-шараны ұйымдастырған қалалық білім бөлімі мамандарының айтуына қарағанда, бүгінде Қостанайда бірнеше асық ату үйірмесі жұмыс істейді екен. Соның бірі – №3 балабақшада. Мұнда 25 бала ұлттық ойын үйірмесіне барып жүр. «Біздегі үйірме ата-аналар мен балалардың қалауы бойынша ашылған. Қазір жақсы жұмыс істеп жатыр. Ұлттық ойындарды үйрететін жалғыз үйірме – осы. Мұндай үйірмелер батыл болуға, мергендікке, ширақтыққа үйретеді, баланың ойлау қабілетін дамытады», дейді мектепке дейінгі тәрбие беру мекемесінің өкілдері.
Жарыс қорытындысы бойынша, 54 ұпай жинаған №3 балабақшаның мергендері бірінші орынды жеңіп алып, жеңіс тұғырынан көрінді. Жабылып жүріп 48 ұпай жинаған №44 балабақшаның бөбектері екінші орынға табан тіресе, олардан небәрі екі-ақ ұпай айырмашылығымен артта қалған №8 балабақшаның батырларына үшінші орынды қанағат тұтуға тура келді.
Қостанай облысы
