Қоғам • 27 Қараша, 2023

Бірегей орталық

116 рет
көрсетілді
2 мин
оқу үшін

«Iqostanay» смарт-ор­та­лығында дарынды шәкірттердің қарым-қабілетін ұштауға, ба­ла­ның жаны қалаған ғы­лым саласына ден қо­йып, өнер үйренуіне қа­жеттің көбі табыла­ды. Құны 11,3 млрд тең­ге болатын қосымша білім беру орталығы­ның іргетасы былтыр қа­ланған. Содан бергі бір жылдан аса уақыт ішін­де құрылысы толық аяқталып, балалардың игілігіне беріліп отыр.

Бірегей орталық

Заманауи сәулет үлгісімен салынған, ауданы 12 мың шаршы метр болатын үш қабатты ғимаратта соңғы буын­ды компьютерлермен жаб­дықталған киберспорт за­лы, инженерия, гидропоника, аквапоника кабинеттері, виртуалды шындық бөлмесі, 3D модельдеу кабинеті, роботтехника және күн бата­реясы мен жел генераторла­ры бар жаңартылатын қуат көздері үйірмесі, 300 орын­дық мәжіліс залы, LED экраны бар коворкинг залы, ме­диа құрылғылармен жаб­дық­талған оқу залы, режиссерлік және актерлік шеберлік шың­­дайтын кабинеті бар. Оқу­­шылар сарайында 1 300 да­рынды балаға арналған ғы­лыми техника, экология және биология, эстетика бағыт­тарындағы 48 үйірме жұмыс істейді. Смарт-орталық ашыл­ған күні облыс әкімі Құмар Ақсақалов арнайы бас сұғып, кабинеттерді аралап көрді.

– Енді балаларға мектеп­тен тыс уақытта ғылыми ізденістермен айналысып, білімін арттыруға, бойдағы қабілетті жетілдіруге мүм­кін­дік бар. Жаңа орталық оқу­шылардың білім деңгейін да­мытып, республикалық, ха­лық­аралық білім жарыста­рына жиі қатысуына жол аша­ды. Баланың жан-жақ­ты дамуына жақсы жағдай жасалған мұндай орталықтар ауыл балалары үшін де ауадай қажет. Бұл мәселені біз алдағы уақытта аудан әкімдерімен бірге талқылайтын бола­мыз. Ол үшін жақсы ғимарат іздеу керек, облыс қазынасынан қа­­ражат бөлінуге тиіс, – деді әкім.

выр

«Iqostanay» смарт-орта­лы­ғында оқушыларды ғылыми техникаға үйрететін 26 топ, экология мен биология бо­йын­ша 8 топ, эстетикалық ба­ғыт бойынша 14 топ ашылады деп жоспарланған. Әзір­ше 850 ата-анадан өтініш түсіп­ті. Жаңа білім мекемесіне 84 адам тұрақты жұмысқа орна­ласқан.

– Бізде еңбек өтілі жоға­ры білікті мұғалімдер де, жаңа келген жас мамандар да бар. Сонымен қатар С.Мәуленов атындағы гимназия, физика-математика лицейі сияқты ин­новациялық мектептер­дің мұғалімдері де қосым­ша жұ­мыс істейді, – дейді «Iqostanay» оқушылар сарайы директорының міндетін ат­­қа­рушы Мұрат Нұржанов.

 

Қостанай облысы