Алдымен қоғамдық дәрістің негізгі мақсаты туралы айта кетелік. Жалынды жастарды бизнеспен айналысуға жұмылдырып, бұл тараптағы мүмкіндіктер туралы ақпарат беру, ынталарын арттыру айрықша маңызға ие.
Облыстық жастар-ресурстық орталығының басшысы Дастан Ермеков өз сөзінде жастарға арналған дәріс жұмыссыздықпен күрес және жаппай кәсіпкерлікті дамытуға дем беретіндігін атап өтті. Оның айтуынша, алдағы міндеттерге қол жеткізу және ел экономикасының тұрақты дамуы үшін жас кәсіпкерлерді қолдау өте қажет.
Спикерлер бизнеске қалай келгенін, кәсіптерін қалай бастап дамытқанын егжей-тегжей айтып берді. «Көз қорқақ, қол батыр» демекші, әркім өзінің қолынан келетін кәсіпті қолға алса, өзіне де, маңайындағы жұртқа да септігі тимек. Жастардың материалдық игілікпен қатар рухани әлемді нұрландыруға да аянбай атсалысуы әбден құптарлық. Мәселен, облыс орталығында ұлттық өнерді насихаттауға атсалысып жүрген өнерпаздың бірі Аслан Мұхамедияров «Асыл ән» ұлттық өнер мектебінің негізгі мақсаты туралы айтып берді.
Іс-шара соңында жастар спикерлерге өздерінің қызықтырған сұрақтарын қойып, толықтай жауап алды. Әр спикерге ұйымдастырушылар тарапынан алғыс хаттар, ал студенттерге сертификаттар табысталды.
Көкшетау
