Статистикалық мәліметке сүйенсек, елімізде 30 жыл ішінде жол-көлік апатынан 83 мыңнан астам адам қаза тапқан. Кейінгі үш жылда Қазақстан жолдарындағы жол-көлік оқиғалары жыл сайын 6 пайызға өсіп келеді. Сарапшылардың айтуынша, мұндай апаттардың 87 пайызға жуығы жүргізушілердің кінәсінен болады.
Жол-көлік апаты депутаттардың да назарында. Мәжілістің кейінгі бірнеше отырысында осы мәселеге қатысты депутаттық сауал жолданды. Мәселен Ерболат Саурықовтың келтірген деректеріне сай, 2023 жылдың он айында елімізде 11мың 618 жол көлік оқиғасы болған. Салдарынан 1942 адамның өмірі қиылған. Жан тапсырған жасөспірімдер мен балалар саны да аз емес. Ал әртүрлі деңгейдегі дене жарақатымен түскендердің саны 14 мың 456 адамды құрап отыр.
Ал депутат Наурыз Сайлаубай бұған жүргізушілерді даярлау деңгейінің төмендігі, қарапайым жол қозғалысы ережелерін білмеу және жүргізуші куәлігін алу орындарындағы сыбайлас жемқорлық себеп болып отырғанын алға тартады.
«Бірнеше рет емтихан тапсыра алмаған азаматтар амал жоқтан мәселені жеңіл шешудің жолдарын іздейді. Заңды айналып өтуге тырысады. Әлбетте мұның салдары сыбайлас жемқорлыққа алып келеді. Көлік жүргізу куәлігін алу қиындап кеткені де халық арасында наразылық туғызып отыр. Биыл Ішкі істер министрінің 20 шілдедегі бұйрығымен жүргізуші куәліктерін беру қағидаларына өзгерістер енгізілгенімен, сыбайлас жемқорлық дерегін азайту мәселесі әлі шешім таппағанын көріп отырмыз», дейді Н.Сайлаубай.
