Аймақтар • 04 Желтоқсан, 2023

Тоғыз күдікті ұсталды

177 рет
көрсетілді
3 мин
оқу үшін

Қылмыстың өтеуі – жаза. Әсіресе мал ұрлағандарға қарсы қолданылатын жаза қатаңдатылғанымен, төрт түлікті қорадан да, өрістен де қолды ететіндер азаяр емес. Мәселен, Атырау облысында жыл басынан бері 24 мал ұрлығы тіркелген.

Тоғыз күдікті ұсталды

Облыстық полиция департа­менті криминалдық полиция бас­қармасының бөлім басшысы, полиция подполковнигі Абай Жұма­баевтың мәліметінше, мал ұрлығына байланысты 9 күдікті ұсталған. Күдіктілердің дені – тепсе темір үзеді дейтіндей жас жігіттер.

«Мал ұрлығы әсіресе ауыл тұр­ғындарын мазалап отыр. Сол себептен «Мүлікті қорғау жөніндегі 2021-2023 жылдарға арналған бағ­дарламасын іске асыру жөніндегі іс-шаралар» жоспары жасақталды. Аталған жоспарға сәйкес жергілікті атқарушы органдармен бірге мал ұрлығының алдын алу, қылмысты ашуға бағытталған бірқатар іс-ша­ра қабылданды. Ветеринария өкіл­дерімен арада қол қойылған мемо­рандумға сай арнайы жұмыс тобы құрылды», дейді А.Жұмабаев.

Полиция өкілінің дерегіне сүйен­сек, өңірде малды уақытша ұс­тауға арналған 9 арнайы орын ашылған. Малды құжатсыз тасы­мал­даған 41 адам әкімшілік жауапкершілікке тартылыпты. Ал қараусыз жүрген 651 мал арнайы орынға қамалған.

«Бұрын мал ұрлаған күдіктілер мен жәбірленушінің татуласуы­на байланысты қылмыстық іс тоқ­татылатын еді. Ішкі істер минис­трлігінің ұсынымен Қылмыстық кодекске өзгерістер мен толықтырулар енгізілді. Енді мал ұрлығының жеке нормасына сәйкес кінәлілер 5 жылдан 12 жылға дейін бас бостандығынан айыру жазасына тартылады. Бұл өзгеріс 2020 жылдың 11 қаңтарында заңды күшіне енді», деп мәлім етті А.Жұмабаев.

Өткен аптада Индер аудандық сотында мал ұрлаған үш сотталушыға қатысты қылмыстық іс қаралды. Екі тұрғынға Қылмыстық кодекстің 188-1-бабы 3-бөлігінің 1, 2-тар­мақ­та­рымен, ал үшіншісіне 188-1-ба­бы 2-бөлігінің 1-тармағымен айып тағылған. «Сотталушылар алдын ала сөз байласып, бөтеннің аула­сына кіріп, бірнеше рет мал ұрла­ған. Үштіктің біреуі алдын ала сөз байласу арқылы бөтеннің малын өрістен жасырын жымқырған. Сотта­лушылардың кінәсі іс материалдарымен толықтай дәлелін тапты», деп хабардар етті аудандық соттан.

Мал иелеріне 1 млн 700 мың теңге көлемінде залал келтірілген. Сот үкімімен сотталушылардың екеуі Қылмыстық кодекстің 188-1-бабы 3-бөлігінің 1,2-тармақтарымен кінәлі деп танылды. Оларға мүлкін тәркілемей, 5 жыл 6 ай мерзімге бас бостандығынан айыру жазасы тағайындалды. Ал үшінші сотталушы Қылмыстық кодекстің 188-1-бабы 2-бөлігінің 1-тармағымен кінәлі деп танылып, оған мүлкін тәркілемей, 3 жыл мерзімге бас бостандығынан айыру жазасы тағайындалды.

 

Атырау облысы