Қазір бұл заманауи зияткерлік ойын көпшілікке кеңінен таныла бастады. Бүгінде Астана қаласының өзінде 20-дан аса куиз ойыны тұрақты түрде айына бірнеше рет ұйымдастырылады. Бірақ бұл куиздердің көбі орыс тілінде өтеді. Қазақ тілінде өтетін куиздер санаулы ғана. Биыл бұл қатар толыға түсіп, «TezTap», «Bastime» ойындарына IQas корпоративтік куизі қосылды.
Ойынның ұйымдастырушысы Мерей Ермұхановтың айтуынша, IQas куизінің ерекшелігі – қатысушы құрамалар бір ұжымнан құралады. Яғни бір ұжымдағы қызметкерлердің өзара байланысын нығайтуға септігі мол.
Ай сайын өкізіліп тұратын IQas корпоративтік куизіне біздің «Егемен» командасы тұрақты қатысып келеді. Бұған дейін екі рет қатарынын екінші орын иеленген едік. Осы жолғы қараша айының қорытынды ойынында біздің команда 32 ұпаймен топ жарды. Ал екінші орынды 26 ұпаймен «KEGOC» акционерлік қоғамының командасы иеленсе, 25 ұпаймен үшінші орынды Инженерлік техникалық орталығының қызметкерлерінен құралған «РМК» командасы алды.
IQas жобасы өте қызықты, әдеттегі куиз форматында жасалса да, өзіндік ерекшелігі бар. Сұрақтары аса күрделі емес. Кез келген қатысушы жауабын таба алатындай логикаға құрылған.
