Аса жеңіл салмақта күрескен Ақмарал Науатбекке (48 кг, J2) тең келер ешкім табылмады. Барлық қарсыласын еш қиналмай ұтқан қазақ қызы финалда әзербайжандық Шахана Гаджиеваны қос жауырынымен жерге қадап, алтыннан алқа тақты. Даяна Федосова (57 кг, J2) ақтық сынға дейін алқынбай жеткенімен, шешуші тұста өзбекстандық Күсісхан Ходжиеваға жол берді. Зарина Райфова да (70 кг, J2) дәл сол межеден көрінсе, Динара Куджулова (70 кг, J1) мен Айдана Ғазизқызы (+70 кг, J2) қолаға қол созды. Ерлердің бәсекесінде Олжас Оразалыұлы (73 кг, J2) мен Жұрқамырза Шүкірбеков (+90 кг, J2) екінші орынды иеленсе, Ерғали Шамей (+73 кг, J1), Ерлан Өтепов (+90 кг J2) және Ерлан Қонкиев (+90 кг, J2) үшінші сатыға табан тіреді.
Естеріңізге сала кетейік, Жапония астанасындағы жарыста 46 мемлекеттен келген 190-ға тарта парадзюдошы бақ сынады. Ал Қазақ елі намысын 18 спортшы қорғады.
