Облыстық мәдениет басқармасы ұйымдастырған дәстүрлі өнер байқауына еліміздің әр өңірінен келген өнерпаздар қатысты. Кілең күміс көмей әншілер бас қосқан дәстүрлі ән мерекесінде Нұржанның бұрын көп айтылмай келген «Көкен-ай», «Бәтимаға», «Ара-ай», «Асыл-ай», «Жан сәулем», «Назым», «Заман қалпы», «Мұқидаш-ай», «Ұлағат», «Неше сафл, неше бап» атты шығармалары әуеледі. Байқауға қатысқан жыршы-термешілер Нұржанның назымдары мен әндерін орындаумен қатар, бұрыннан өздерінің ән қоржынында жүрген музыкалық шығармаларын шырқап, көрермен қауымның құлақ құрышын қандырды.
Дәстүрлі жыршы-термешілердің өнерін әйгілі жыршы, фольклор зерттеуші Алмасбек Алматов бастаған қазылар алқасы таразылап отырды.
Топжарған ақын Нұрхан Ахметбеков дөп басып баға беріп:
Қазақта Наушабайдың Нұржаны өткен,
Арқаға ән тұқымын сол еді еккен.
Тобылдан көтерілген бір зор айқай
Сібір мен Сыр суына балын төккен, деп жырына арқау еткен Нұржан әндері – Арқаның паң даласындай мінезді, ырғағы асау, ішкі иірімге бай, шоқтығы биік туындылар.
Дәстүрлі өнер мерекесі мәресіне жеткенде алыс-жақыннан арнайы келген өнерпаздардың бәріне құрмет көрсетіліп, Нұржан әндері байқауының арнайы мүсіншесі мен ақшалай сыйлықтар табыс етілді.
Қостанай облысы
