Атырау қалалық тұрғын үй-коммуналдық шаруашылық бөлімінің сектор меңгерушісі Нұржан Саясаттың айтуынша, бұл баспаналар апатты тұрғын үйлердің тізіміне тіркеліп, жол картасы жасалған. Мақсат – ескі үйлердің тұрғындарын жаңа баспанамен қамту.
«Қалалық әкімдіктің бюджетінен апатты үйлердің иелеріне «Модерн» тұрғын үй кешенінен жаңа пәтерлер сатып алынды. Жыл соңына дейін тағы бір апатты жағдайдағы ескі тұрғын үйдің иелері жаңа баспанаға көшіріледі», деді Нұржан Саясат.
Жаңа қонысқа көшкен тұрғындардың қатарында Ирина Галич те бар. Оның отбасы 53 жыл бұрын салынып, кейін апатты жағдайға ұшыраған үйде ұзақ жыл тұрған.
«Бұрын екі қабатты ескі үйдегі әр күнімізді уайыммен өткізуші едік. Әсіресе балаларымыз үшін қорқып, жанымызды шүберекке түйіп жүрдік. Ұйқымыз да тыныш болмайтын. Енді, міне, көптен күткен қуанышқа кенелдік. Жаңа пәтерге ие болып, қиындықтың артта қалғанына қуандық», деді Ирина Галич.
Жаңа пәтерді көп күткендердің қатарында Айгүл Бекесова да бар. Ол отбасымен 1947 жылы пайдалануға берілген ескі үйде тұрған. Осы кезге дейін құлау қаупі төнген баспананы 9 отбасы паналап келген.
«Ескі үйде тұрудың қиындығы көп. Әр күніміз уайыммен өтетін еді. Бірақ жаңа баспана алудан үмітімізді үзбедік. Сол үмітіміз ақталып, жаңа пәтерге ие болдық. Әсіресе балалардың қуанышында шек жоқ», дейді Айгүл Бекесова.
Атырау облысы
