Атап айтқанда, еліміздің бірінші, әлемнің 31-ракеткасы Александр Бублик Аделаиде ATP 250 турнирінде ширек финалға шықты. Ол алғашқы кездесуін дүниежүзілік рейтингіде 278-орында тұрған аустралиялық Джеймс Маккейбпен өткізіп, айқын басымдық танытты – 6:2, 6:3. Ал екінші матчында британиялық Дэниел Эванспен жолығып, ойын тағдыры үш сетте шешілді. Сөйтіп, 4:6, 6:2, 6:1 есебімен А.Бублик жеңді.
Сондай-ақ еліміздің жұптық сындағы бірінші, әлемнің 46-ракеткасы Александр Недовесов те Аделаиде ATP 250 турнирінің ширек финалына шықты. Ол эквадорлық Гонсало Эскобармен бірге екінші айналымда жарыстың 7-ракеткалары, ұлыбританиялық Ллойд Глaсспул – нидерландтық Жан-Жюльен Ройермен кездесті. Есеп – 6:4, 6:4.
Тағы бір отандасымыз Бейбіт Жұқаев Аустралия ашық чемпионатының іріктеу сайысын жеңіспен бастады. Ол іріктеу сайыстарының ширек финалында дүниежүзілік рейтингіде 511-орында тұрған аустралиялық Николас Кикерді 6:1, 6:4 есебімен жеңді.
