Мұратсай ауылында 773 адам, оның ішінде 269 бала тұрады. Фельдшерлік-акушерлік пункттің штатында бір фельдшер, бір акушер, төрт медбике және бір мейіргер бар.
Құрылысына 303 856 168 теңге жұмсалған жаңа ғимаратта фельдшердің қабылдау кабинеті, әйелдерге арналған қарау бөлмесі, емшара, егу, сүзгі, қақырық алу, тіркеу бөлмелері, химизатор, қойма, санитарлық-тұрмыстық бөлме көзделген. ФАП барлық қажетті медициналық жабдықпен, ұйымдастыру техникасымен, жылыту жүйесімен жабдықталған. Нысанның жалпы ауданы 330,81 шаршы метр, бір ауысымда 25 адамды қабылдай алады.
Жалпы, 2023 жылы Бөкей ордасындағы екі медициналық нысан күрделі жөндеуден өтіп, жаңадан төрт «Жедел жәрдем» көлігі берілді. Облыс орталығынан ең шалғай жатқан ауыл болғандықтан, маман тапшылығы да сезілетін. Соған орай ауданға былтыр екі маман келді, ал 2024 жылы тағы төрт дәрігер жас маманды орналастыру жоспарланған.
«2024 жылы Бөкей ордасы ауданында тағы төрт медициналық пункт ғимараты күрделі жөндеуден өтіп, бір дәрігерлік амбулатория салынады. 2025 жылға дейін елді мекендер тұрғындарын медициналық қызметпен толық қамтамасыз етеміз», дейді аудандық аурухана директоры Анарбек Белисанов.
Осындай жақсы жаңалық барлық ауданда болып жатыр. Қазталов ауданының Бостандық ауылы тұрғындары да жаңа жыл қарсаңында жаңа емхана ғимаратымен қауышты. Аудан бойынша 43 медициналық нысанның халыққа қалтқысыз қызмет көрсетуі үшін мемлекет бар мүмкіндікті жасайды.
Жаңа ғимаратта дәрігерлер күніне 30 адамды қабылдай алады. Амбулаторияда 6 кереуеттік күндізгі стационар, баланы дамыту, физиопроцедура, стамотология, акушер кабинеттері, зертхана бар. «Жақында ғана біздің амбулаторияға жаңа көлік берілген еді. Осының бәрі ауыл тұрғындарына, халыққа деген қамқорлық қой. Біз де өз тарапымыздан халыққа сапалы медициналық қызмет көрсетуге тырысамыз», дейді жалпы тәжірибелік дәрігер Әлнура Құрманғали.
«Ауылдық денсаулық сақтауды жаңғырту» ұлттық жобасы аясында Жаңақала ауданында да бір медициналық нысан жаңадан салынып, төрт нысан толық күрделі жөнделді.
«Облыс әкімі мен мекеме тарапынан көрсетілетін тұрғын үй, көтермеақы секілді әлеуметтік қолдау шараларының нәтижесінде Жаңақала ауданында бес жас маман жұмысқа орналасты. Соның ішінде Көпжасар және Жаңақазан ауылына дәрігер келіп, елге қызмет көрсетіп жатыр. Биыл науқас тасымалдауға қажетті толық жасақталған 3 медициналық көлік алдық», дейді Жаңақала аудандық ауруханасының директоры Ербол Сәрсенғалиев.
Айта кетейік, Батыс Қазақстан облысында 2023 жылы денсаулық сақтау жүйесін қаржыландыруға 92,8 млрд теңге қарастырылған еді. Медициналық ұйымдарды жарақтандыру үшін жергілікті бюджеттен 3,6 млрд теңге бөлініп, 337 медициналық жабдық сатып алынды. 1 712,5 мың теңге жергілікті бюджет қаражатына 81 автокөлік алынып, аудан мен ауылдағы медицина мекемелеріне табыс етілді. 22 денсаулық сақтау нысанына күрделі жөндеу жұмысы жүрді.
«2023 жылы облысқа келген 122 жас маман жұмысқа орналастырылды. Соның ішінде 50-і ауылдық жерге барды. 92 жас маман біржолғы көтермеақы алып, 15 маманға қызметтік тұрғын үй берілді», дейді Батыс Қазақстан облыстық денсаулық сақтау басқармасының басшысы Ерлан Тоқсанов.
Ауыл халқының денсаулығын сақтау, оларға сапалы медициналық қызмет көрсету биыл да басты назарда болмақ.
Батыс Қазақстан облысы
