Суретті түсірген – Ерлан ОМАР, «EQ»
Өткен жылы облыстық балалар клиникалық ауруханасында дәп осындай 10 операция жасалыпты. Оның әрқайсысының құны 10 миллион теңгеге жуық.
Кезбе жүйкесіне стимулятор қою – ең күрделі операция. Мұндай операцияны облыстық клиникалық балалар ауруханасы дәрігерлері 2020 жылдан бастап жасап келеді. Стимулятор 5 жылға орнатылады, одан кейін батареяны ауыстыру қажет.
– Операция барысында екі тілік жасалады. Біреуінен кезбе жүйкесі шығарылып, оған арнайы электрод жалғанады. Ол екінші тілікке дейін созылып, кеуде қуысына бекітіледі. Сосын терінің астына аппарат салынады. Операция кезінде оның жұмысы тексеріледі, – дейді аурухананың нейрохирург-дәрігері Руслан Хаутиев. 2021 жылы төрт науқасқа, одан кейінгі жылы алты балаға, биыл он балаға операция жасадық. Жоспарлы операцияның құны 9,5 млн теңгеден асады. Мұны әлеуметтік медициналық сақтандыру қоры төлейді. Бұл – ата-аналарға қаржылық көмек қана емес, науқас балалардың қалыпты өмір сүруі үшін үлкен қолдау.
Стимулятор орнатылған алғашқы пациенттердің бірі 14 жастағы қарағандылық болды. Ол екі жасынан эпилепсиямен ауырған. Дәрі-дәрмекпен жүргізілген ем де талманы баса алмаған. Қыздың анасының айтуынша, эпилепсиялық ұстама тәулігіне 90 ретке дейін қайталаған сәттері де
болған.
«Қызыма аппарат қойылғаннан бері екі жылдан аса уақыт өтті. Қазір ол өзін жақсы сезінеді. Операциядан соң 8 айдан кейін баланың белсенділігі артқанын, есте сақтауы мен сабақ үлгерімі жақсарғанын аңғардық. Құрылғы оны мүлдем мазаламайды. Операцияға дейін бір айдай тексерілдік. Стимулятор қойғанымызға еш өкінбейміз», дейді науқастың анасы.
Қарағанды облысы
