Біріншіден, бұл сұхбат – жай ғана жыл қорытындысы емес, Қ.Тоқаевтың билік басына келгеннен бергі жұмысының басты аспектілері жөніндегі терең баяндама.
Екіншіден, сұхбат мемлекеттік тілдегі газетке берілуі – Президенттің мемлекеттік тілге айрықша назар аударатынын, ана тіліміздің саяси тұтқаға айналғанының үлгісі.
Үшіншіден, заманауи саяси үдерістердің қай бағытқа дамып бара жатқанын қамтып, «бүгіннің басты мәселесі неде?» деген сұраққа дәлелді жауап береді.
Мемлекет басшысы жауабындағы көңіл аударатын мәселе – қоғамда көп таралған Қазақстандағы «қос билік» жөніндегі алыпқашпа әңгіме. Шыны керек, еліміздегі ескі билік жеке экономикалық мүддесін қорғап қалу үшін мемлекетті қосарлана басқаруға тырысқаны анық.
Олар «өзі би, өзі қожа» кезін аңсап, мемлекеттік басқару тетіктерін қайтаруға күш салғаны да ашық айтылды. Дегенмен билік бүгінде халықтың басым көпшілігінің мандаты негізінде Президент Қасым-Жомарт Тоқаевтың нық қолында.
Диалектиканың «терістеуді терістеу» деген заңы бар. Бүгінде ескі жүйенің істеген қателіктері мен шалыс қадамдарын түзету кезеңі өтіп жатыр. «Кеттің бе – қайырылма!» Өте дұрыс аксиома! Кеткен саяси тұлға саясатқа араласпауға тиіс. Осынау күрделі алмағайып заманда Президент билігі нық және мықты болуы керек. Нық билікпен саяси плюрализмді қолдай отырып, даму қажет.
Елімізде саяси реформалар іс жүзіне асып келеді. Қазақстан перманентті сайлау кезеңінен өтті. Елімізде ауыл әкімдерінің барлық деңгейдегі Мәжіліс, мәслихат депутаттары сайлауы, аудан әкімдері сайлауы өтті. Қазақстанда жаңа саяси мәдениет қалыптасып келеді.
Сонымен қатар экономика саласында құрылымдық өзгерістер жасау керек. Ішкі жалпы өнім өскенімен, сол өнімді халық арасына әділетті жеткізу, бөлу проблемасы бар. Жалпы, шешімін күткен мәселелер көп. Қазірде экономикалық теңдік қалыптастыру кезеңі жүріп жатыр. Келесі кезең саяси реформаларды халықтың әл-ауқатын арттыру іргетасына ұластыру болмақ.
Ерлан САИРОВ,
Мәжіліс депутаты
