Алматыдағы Мемлекеттік орталық музейде есік ашқан «Халық жүрегіндегі қаһарман» деп аталған көрмені тамашалап, Сағадат әлеміне саяхаттап қайттық. Жастардың жігерін жанып, рухын көтеретін мазмұнды іс-шараны тағылым ордасы Қарулы күштердің әскери-тарихи музейімен бірлесе ұйымдастырған.
Көшпелі көрмеге Халық қаһарманының тіршілігінде тұтынған жеке заттары, еш жерде жарияланбаған фотосуреттері мен құжаттары, батырдың өміріне қатысты бірегей жәдігерлер қойылған. Мұндағы 100-ден аса экспонаттың әрбірі генералдың өмір белестерінен хабар береді. Әсіресе оның 1943 жылы әскер сапындағы сарбаз сәтінде таспаланған суреті, майдандағы ерлігі үшін 1945 жылы Кеңес Одағының батыры медалін алып тұрған кезін бейнелейтін естелік сурет бірден назар аудартады. Батырдың туған жері, өскен ортасы туралы кең ауқымды мәліметтерді, ол туралы жазылған кітаптар мен мақалалар тізбегін де көрме төрінен табасыз.
Көрменің ашылу салтанатына Сағадат Қожахметұлымен қызметтес болған ардагерлер, «Жас сарбаз» әскери-патриоттық сыныбының тәрбиеленушілері және әскери қызметкерлер қатысты. Батыр рухына арналған патриоттық әндер шырқалып, жас сарбаздар жырдан шашу шашты. Армия генералынан тағылым алған әскери сала ардагерлері оның адами болмысы мен қайраткерлік қыры хақында естеліктерімен бөлісті.
«Өнегесі елге мұра, ұрпаққа ұран болған Халық қаһарманы Сағадат Нұрмағамбетовтің есімі әскери сала мамандарының аузында аңыздай айтылуы тегін емес. Ол кісінің батылдығы, қайсарлығы, еліне деген сүйіспеншілігі – жастарымызға жарқын үлгі. Аталған көрмеден өскелең ұрпақ шабыт алып, Отан қорғаудың мән-маңызы, елге қызмет етудің өнегесі туралы ой қалыптастырса дейміз. Көрмеге қатысқан жас сарбаздардың көзінен осындай ұшқын көрдік», дейді Мемлекеттік орталық музей директоры Рашида Харипова.
Көшпелі көрме орталық музейде он күнге жалғасып, артынша ел аймақтарын араламақ. Мемлекеттік әскери-тарихи музейдің қызметкері Дәулет Қадыров тұлғаның ғасырлық тойына орай еліміздің әр өңірінде осындай айшықты жобалар салтанат құратынын, үлкен қалаларда өтетін негізгі іс-шаралардың бәріне мұндағы маңызды жәдігерлер апарылатынын жеткізді.
«Бүгінгі іс-шара Сағадат Қожахметұлының ерен еңбегін үлгі ете отырып, ұрпаққа әскери-патриоттық тәрбие беруге, сондай-ақ, ел Қарулы күштерінің имиджін арттыруға, музей ісін насихаттауға және одан әрі дамытуға бағытталып отыр», дейді ол.
АЛМАТЫ
