![Гендерлік саясаттың ұлттық үлгісі](/media/2024/01/24/genderlik-sayasattynh-ulttyq-ulgisi.webp)
Төраға орынбасары еліміздің әйелдер құқықтарын қорғау және гендерлік теңдік мәселелерін ілгерілету саласында айтарлықтай нәтижеге қол жеткізгенін атап өтті. Гендерлік саясаттың ұлттық үлгісі, құқықтық база және адам құқықтарын қорғау тетігі жасалды.
«Мемлекет басшысы жүргізіп отырған әлеуметтік жаңғыртудағы негізгі бағыттардың бірі – елімізде гендерлік тепе-теңдікке қол жеткізу, әйелдердің саяси, экономикалық және әлеуметтік өмірге белсенді қатысуына тең мүмкіндіктер жасау. Сайлаудағы партия тізімдеріне, сондай-ақ депутаттық мандаттарды бөлу кезінде әйелдерге, жастарға және мүгедектігі бар адамдарға заңнамалық деңгейде 30% квота енгізілді. Бүгінгі таңда еліміздің жоғары өкілді органы – Қазақстан Парламентінде 31 әйел бар, ол жалпы депутаттар санының 21%-ын құрайды. Оның ішінде Сенаттың 24%-ы, Мәжілістің 19%-ы әйелдер», деді Ольга Перепечина.
Кездесуге қатысушылар адам әлеуетін дамыту мен теңдей қатысу, тиімді институттар, адам құқықтары мен гендерлік теңдік, сондай-ақ инклюзивті экономикалық өсу мен экологиялық тұрақтылық саласындағы ынтымақтастықты одан әрі дамыту мәселелерін талқылады.
Ольга Перепечина тұрақты даму саласындағы ұлттық мақсаттар мен міндеттердің іске асуына мониторинг жүргізу жөніндегі парламенттік комиссияның отырыстары туралы айтып берді. Онда денсаулық сақтау мен білім берудің сапасын көтеру және экологияны қамтамасыз ету мәселелері қаралды.
Ник Хартманн өз кезегінде Қазақстанда жүргізіліп жатқан қоғамдық-саяси өзгерістерді жоғары бағалап, барлық бағыттағы ынтымақтастық аясын кеңейтуге назар аударды.