Суретті түсірген – Ерлан ОМАР, «EQ»
Мәселен, Атырау облысында кейінгі үш жылда «Аңсаған сәби» бағдарламасымен балалы болғысы келетін отбасылар үшін 679 квота бөлініпті. Енді биыл сәби сүюді аңсағандарға 232 квота қаралып отыр.
«Экомед-Атырау» ЖШС клиникасының гинеколог-дәрігері, репродуктолог Құндыз Дәулетиярованың айтуынша, «Аңсаған сәби» бағдарламасының басты мақсаты – қосалқы репродуктивті технологияның көмегімен отбасылық-демографиялық мәселелерді оң шешуге жәрдемдесу. Басқаша айтқанда, бала сүйгізетін бағдарламаның артықшылығы көп.
«Елімізде 2021 жылдан бері бедеулікке қарсы «Аңсаған сәби» бағдарламасы іске асырыла бастады. Қазақстанда бұл процедура қолға алынғалы бері бала сүйген бақытты отбасылардың қатары көбейді. Бұл бағдарламаға 18-42 жасқа дейінгі әйелдер қатыса алады. Бағдарламаға қатысушы өзінің келісімімен арнайы консультациядан, медициналық тексеруден өтеді. Мұның бәрі міндетті іс-шара», дейді Қ.Дәулетиярова.
Оның дерегіне сүйенсек, Атырау облысына 2021 жылы – 233, 2022 жылы 213 квота бөлінген. Ал өткен жылы атыраулық аналарға 233 квота ұсынылған. Бірақ квотаның 20-сы сұраныстың көптігіне байланысты Алматы облысына берілген.
«Былтыр Атырау облысында 213 квота игерілді. Бағдарламаға қатысқан 59 әйел дәрігерлердің көмегімен бала көтерді. Алайда 9 ана түсік тастады. Қазір 47 ана сәби күтіп отыр. Үш ана өмірге нәресте әкелді. Өзге аналар тиісті іс-шараларды қабылдап жүр», деді Қ.Дәулетиярова.
Атырау облысы
