Кәсіп иесі – Еркеш Түсіпқызы. Наубайхананың ашылу рәсіміне Талды селолық округінің әкімі Нұрлан Аманұлы қатысып, кәсіпкердің бастаған ісіне табыс тіледі.
– Бүгінге дейін ауылдағылар нанды қаладан таситын. Үстеме бағасы да қымбаттау. Сондықтан осыдан екі ай бұрын Талды, Берекет, Байбала, Ақбауыр мен Ақшоқы, Аққияқ ауылдарына ортақ наубайхана ашуды жоспарлаған едік. Кәсіпкер Еркеш Түсіпқызына осы істі тапсырып, қолдан келер барлық көмегімізді бердік. Қарағандыдағы «Айсара» диірмені мен ауыл әкімдігінің келісімі бойынша арзан ұн алып тұру келісілді. Демеушілік жасап отырған диірмен басшысы Бидәулет Балтабаев мырзаға мың рахмет, – деді
Н.Аманұлы.
Қазіргі уақытта наубайханада сұрыпты ұннан күніне 150-200 бөлке нан пісіріледі. Алдағы уақытта екінші пешті іске қосып, нан көлемін тәулігіне 400-ге жеткізуді жоспарлап отыр. Бұдан бөлек, басқа да нан-тоқаш өнімдерін сату жоспарында бар. Жергілікті кәсіпкер жұрттың күнделікті сұранысын орындауды о бастан мақсат еткен. Шағын ғана наубайхана пісірілетін ас атасы ауыл жұртының көңілінен шығып тұр.
Қарағанды облысы,
Шет ауданы
