Суретті түсірген – Руслан Қадыров
Жетісуда 336 жалпы білім беретін орта мектеп бар, онда 129 мыңнан аса оқушы оқиды. Бүгінде балалардың жан-жақты дамуына, сапалы білім алуына жағдай жасау және олардың қауіпсіздігін қамтамасыз ету – басты назарда. Осы айтылған мүддеге сәйкес өңіріміздегі 5 ауданға жаңа автобустар табысталды. Салтанатты іс-шарада автобус кілтін табыстаған облыстық білім басқармасының басшысы Марат Сүлейменов мектеп қызметкерлерін құттықтады.
– Өткен жылы шалғай елді мекендердегі балаларды тасымалдау үшін республикалық бюджеттен 53,4 млн теңгеге 7 автобус лизингке алынып, соның екеуі былтыр берілсе, қалған бесеуін бүгін табыстап отырмыз. Сол сияқты 2023 жылы жергілікті бюджеттен 223 млн теңге бөлініп, тағы 5 автобус берілген еді. Бұл шаралар өз кезегінде оқушылардың жан-жақты дамуы мен сапалы білім алуына жағдай жасап, олардың қауіпсіздігін қамтамасыз етуге оң ықпал етеді, – деді М.Сүлейменов.
24 орынды 5 автобус Ақсу, Алакөл, Ескелді, Қаратал, Көксу аудандарының мектептеріне берілді. Енді арнайы көліктер Ақсу ауданы Ю.Гагарин атындағы орта мектебіне Қызылжар ауылынан, Алакөл ауданы Теректі орта мектебіне Талдыбұлақ, Үшбұлақ ауылдарынан, Ескелді ауданы Балпық би атындағы орта мектепке Теңлік, Теректі, Бөктерлі ауылдарынан, Қаратал ауданы Қ.Байсейітов атындағы орта мектепке Айдар ауылынан, Көксу ауданы №12 орта мектепке Айнабұлақ стансасынан, Кемертоған ауылы разъездінен оқушыларды тасымалдау үшін қолданылады.
Автобустардың бәрі интеллектуалды автоматты қауіпсіздікті тексеру жүйесімен, екі қауіпсіздік белдігі бар орындықтармен, салонның артындағы авариялық шығу есігімен, санитариялық-эпидемиологиялық қондырғы секілді қажеттіліктермен жабдықталған.
– Ақсу ауданы бойынша 38 жалпы білім беретін мектеп бар. Оның 27-сі – орта, 7-і – орталау, 4-і – бастауыш мектеп. Біздің ауданда 5 мектептен оқушылар тасымалданады. Бұл күні 4 мектебімізде жаңа автобус бар, тек Суықсай ауылындағы Гагарин атындағы орта мектебіндегі көлігіміз ескілеу болатын. Білім басқармасы бізді қолдап, міне, жаңасын алдық. Қуанышымызда шек жоқ. Облыс әкімдігіне, облыстық білім басқармасына Ақсу ауданы азаматтарының, халықтың атынан алғыс айтамыз. Осы көлікті балалардың игілігіне барынша пайдаланамыз, – дейді Ақсу аудандық білім бөлімінің басшысы Айдынбек Жексембаев.
Қазір 32 бастауыш мектепті оңтайландыру жұмысы қолға алынып, облыс әкімімен бекітілген арнайы жол картасы бойынша бастауыш мектептерде оқитын оқушыларды негізгі және орта мектептерге тасымалдау жұмыстары ұйымдастырылды. Сол үшін жергілікті бюджеттен қосымша тағы да 10 автобус алуға қаражат бөлінген. Енді әр аудан өздері көлік сатып алады. Осылайша, биыл тасымалдау мәселесі толығымен шешімін таппақ.
Жетісу облысы
