Кітап дүкендеріне жиі бас сұғатын оқырман бұл баспаны жақсы біледі. Баспа қазақ жазушыларының таңдаулы шығармаларын, әлем әдебиетінің озық туындыларын қазақ тілінде ұсына отырып, оқырмандардың үздік шығармаларды ана тілінде оқуына үлес қосып келеді. «Фолиант» баспасының бас редакторы Фарида Тобашалова 2023 жыл ұжым үшін табысты болғанын айтады.
«Баспамыздың кітап қоржыны қазақ тіліндегі 150 кітаппен толықты. Оның 60-қа жуығы – көркем әдебиет, 70-і – балаларға арналған, 20-сы нон-фикшн жанрындағы кітаптар. Атап өтсек, Айн Рэндтің 3 кітаптан тұратын «Атлант сілкінді» атты антиутопиялық романын ағылшын тілінен аударып шығардық. Сонымен қатар Марио Пьюзоның «Өкіл әке», неміс ғалымы Роберт Киндлердің «Сталиндік көшпенділер», Грегори Дэвид Робертстің «Шантарам», Маргарет Митчеллдің «Жел өтіндегі тағдырлар», Ремарктың «Салтанат қақпасы» сияқты әлемге танымал туындылар қазақ тілінде басылып шықты. Балаларға базарлық ретінде Баянғали Әлімжановтың «400 тәтті тақпағы» мен Кеңес Оразбекұлының «Тұран баһадүрлері немесе Ер, Би, Нардың ерлік жорықтары» атты кітаптары да жас оқырманға ұсынылды», дейді бас редактор.
Мұндағы көркем әдебиеттің өзі «Сөз-маржан», «Әлемдік классика», «Үздік шетел әдебиеті», «Үздік бестселлер», «Нобель сыйлығының иегері», «Алтын тамыр», «Шытырман оқиғалар», «Әлемдік детектив шеберлері», «Бүгінгі проза» атты 9 сериямен шығады.
«Ал биылғы жоспарға келсек, осы жылы 200-ден аса кітап шығаруды көздеп отырмыз. Әсіресе балалар әдебиетіне үлкен мән беріп отырмыз. Сондықтан қазақ балалар жазушыларының шығармаларын көптеп шығару мақсатында «Қазақ балалар әдебиеті» атты жаңа серияны қолға алдық. Бұл сериямен С.Бегалин, Б.Соқпақбаев, С.Мұратбеков, С.Жүнісов, Т.Рымжанов сынды жазушылардың шығармаларын жаңа форматта, ерекше дизайнмен шығарамыз. Сондай-ақ жаңа автор Әмір Шыңғысханның «Заман. Кентаврдың басынан кешкендері» атты фантастикалық хикаяты жақында оқырманға ұсынылады», деді Ф.Тобашалова.
Сондай-ақ ол былтыр жас жазушыларды қолдау мақсатында «Бүгінгі проза» атты жаңа серия ашылып, Жадыра Шамұратованың «Сандық», Әлішер Рахаттың «Махаббатым – Сonstant. Параллель» романдары шыққанын атап өтті. Биыл да осы серия жалғасып, Ұларбек Дәлей, Қанағат Әбілқайыр, Бақытгүл Сәрмекова, Мира Шүйіншәлиева, Қойшыбек Мүбәрак, Есбол Нұрахмет, Аягүл Мантай, Ерболат Әбікен, басқа да жазушылардың кітаптары жарық көрмек.
«Қазақ әдебиетінің озық туындылары мен қазақ мәдениеті туралы кітаптарды басып шығаруға арналған тағы бір жаңа жобаны қолға алдық. Жоба аясында ұлтымыздың салт-дәстүрі, әдет-ғұрпы, танымы, тілі мен ділі жайында ақпараттық-танымдық кітаптар мен қазақтың төл әдебиетінің проза-поэзиялық туындылары жарық көреді. Өз оқырмандарымыз бен шетелдіктерге де қазақ халқын «этнос» ретінде таныту мақсатында кітаптарды қазақ, орыс, ағылшын тілінде басып шығаруды жоспарлап отырмыз», дейді бас редактор.
Аталған жоба аясында шығатын «Қазақ қазынасы» сериясында қазақтың материалдық және рухани мәдениеті туралы кеңінен баяндайтын Болат Бопайұлының «Қазақ кәдесі», «Киіз үй – ғалам моделі», «Қазақ мінезі» және басқа да құнды кітаптар басылып шығады. Белгілі этнограф Ақселеу Сейдімбектің бірнеше кітабы, қазақ классик жазушыларының шығармаларын ағылшын тілінде шығару бойынша жұмыстар жүргізіліп жатыр.
Сонымен қатар белгілі қаламгерлердің мерейтойы да елеусіз қалмайды. Биыл Жүсіпбек Аймауытұлының туғанына 135 жыл, Сәбит Дөнентайұлына 130 жыл толады. Осыған орай баспадан Ж.Аймауытұлының «Қартқожа», С.Дөнентайұлының «Көркемтай» шығармаларын басылып шықпақ.
Айта кетейік, «Фолиант» баспасы жылда елорда төрінде «Eurasian Book Fair» Еуразиялық халықаралық кітап көрме-жәрмеңкесін ұйымдастырады. Көрме алыс-жақын шетелдерден – Түркия, Қытай, Ресей, басқа да елдер мен отандық баспаларды және кітап дүкендерін бір алаңға біріктіруді, елдегі баспа ісі индустриясын дамытуды көздейді. Аталған көрме биыл 17-21 сәуір аралығында 6-рет өткелі отыр.
