![Мамандыққа баулитын сынып](/media/2024/01/30/atyrau-synyp-80-dgol-foto.webp)
Жақында аталған білім ордасының 8-сынып оқушыларын құтқарушы кәсібінің қыр-сырына оқыту басталды. Құтқарушы формасын киген оқушылар ант беріп, арнайы куәлік алды. Атырау қалалық төтенше жағдайлар басқармасының бастығы Ғабит Бабаевтың айтуынша, «Жас құтқарушы» сыныбы – оқушыларды құтқарушы кәсібіне баулудағы алғашқы қадам. Арнайы сынып бөлмесі құтқарушылар қолданылатын құрал-жабдықтармен қамтылған.
– Өңірдегі алғашқы сыныптың Екінші дүниежүзілік соғыстың ержүрек батыры, әйгілі партизан, қазақтың қайталанбас даңқты перзенті Қасым Қайсенов атындағы мектепте ашылғаны көңіл қуантып отыр. «Жас құтқарушы» сыныбын ашудың бірнеше мақсаты бар. Біріншіден, оқушылардың құтқарушы мамандығына қызығушылығын ояту. Екіншіден, құтқару ісінің негіздерін, төтенше жағдайларды жою мен зардап шеккендерге алғашқы көмек көрсетудің дағдылары оқытылады. Үшіншіден, оқушылар арасында саламатты және қауіпсіз өмір салты насихатталады, – дейді Ғабит Бабаев.
Төтеншеліктер жас құтқарушыларға «Алғашқы көмек көрсету» тақырыбында арнайы дәріс өткізді. «Жас құтқарушы» сыныбының оқушысы Ернар Смадияр болашағын аталған саламен байланыстыруды көздеп отыр.
– Күнделікті тірлікте түрлі жағдай кездеседі. Әсіресе, өрт, техногендік апат болса, алдымен құтқарушылар қолұшын созады. Бұл кәсіп иелерінің жұмысы қиын екенін білемін. Бірақ тәжірибені шыңдау арқылы қиындықты еңсеруге болады. Осы мамандықты таңдауға көңілім ауып отыр. Сол себепті төтенше жағдайлар саласының формасын киіп, «Жас құтқарушы» куәлігін алдым. Үздік оқимын, бокс секциясына қатысып жүрмін. Бұл адамзатты тілсіз жаудан құтқаратын білікті маман болуыма ықпал етеді, – дейді «Жас құтқарушы» Ернар Смадияр.
Атырау қалалық төтенше жағдайлар басқармасының бастығы Ғабит Бабаевтың айтуына қарағанда, «Жас құтқарушы» сыныбының оқушыларына түрлі экскурсия ұйымдастырылады. Сондай-ақ арнайы сабақтар өткізу жоспарланған.
Атырау облысы