Коллажды жасаған – Зәуреш СМАҒҰЛ, «EQ»
6 миллионнан астам баланың 304 815-і 2024 жылы 18 жасқа толады. Олардың барлығына өткен жыл үшін Ұлттық қордан 100 доллар және 52 цент мөлшерінде бірдей сома есептелген. Бұл – тек алғашқы есептеулер ғана. Жыл сайын сома Ұлттық қор активтерінің өсуі және инвестициялық кіріс алу есебінен ұлғайып отырады. Бұдан бөлек, есептелген қаражат Ұлттық қордың валюталық активтерінің құрамында инвестициялануын жалғастыра береді, сөйтіп, бала 18 жасқа толғанға дейін қосымша инвестициялық кіріс әкеледі. Ескере кететін жайт, шотқа түсіп жатқан қаражатты қазір пайдалану мүмкін емес. 18 жасқа толғаннан кейін бағдарлама қатысушылары өздерінің нысаналы жинақтарын тұрғын үйге жұмсауға немесе білім алуға пайдалануға құқылы болады.
«Қазақстан азаматтары болып табылатын және ағымдағы жылы 18 жасқа толатын балалардың БЖЗҚ-дағы нысаналы жинақтау шоттарында жинақталған ақша нысаналы жинақтар деп аталады. Осы қаражатты пайдалану үшін бағдарламаның кәмелетке толған қатысушысы нысаналы жинақтарды БЖЗҚ-дан АҚШ долларымен аударылатын банктік шот ашып, уәкілетті операторларға жүгіне алады. БЖЗҚ-мен келісім жасасқан және «Ұлттық қор – балаларға» бағдарламасы бойынша жұмыс істейтін уәкілетті операторлардың тізімі enpf.kz сайтында орналастырылған», делінген қор мәлімдемесінде.
Баланың бағдарламаға қатысуы туралы және есептелген нысаналы талаптар туралы ақпаратты кәмелетке толмаған баланың ата-анасы (немесе басқа да заңды өкілдері) арнайы ашылған kids.enpf.kz сайтында (баланың ЖСН бойынша) тексере алады. БЖЗҚ бағдарламаға қатысушы балалардың толық тізімін жыл сайын «Жеке тұлғалар» мемлекеттік дерекқорынан алынған ресми мәліметтер негізінде қалыптастырады. Егер бала осы дерекқорға қосылған болса, ол автоматты түрде «Ұлттық қор – балаларға» бағдарламасының қатысушысы атанады және оған бағдарламаға қатысқан барлық жылдар ішінде нысаналы талаптар мен инвестициялық кіріс есептелетініне кепілдік беріледі.
Егер бала қандай да бір себептермен «Жеке тұлғалар» мемлекеттік дерекқорында болмаса және осы себепті бағдарламаға қатысушылардың тізіміне енгізілмеген болса (бірақ оның қатысушы болуға құқығы болса), онда нысаналы талаптар келесі күнтізбелік жылы өткізіп алған кезең (өткізіп алған кезеңдер) үшін толық көлемде (инвестициялық кірісті қоса алғанда) есептеледі.
Бұл жағдайда балалардың ата-аналары (заңды өкілдеріне) мына деректерді тексеруі керек:
- Балада жеке басын куәландыратын құжаттың болуы (туу туралы куәлік, 16 жастан бастап – Қазақстан Республикасы азаматының жеке куәлігі);
- Жеке басын куәландыратын құжатта деректемелердің болуы және олардың дұрыс көрсетілуі: Т. А. Ә., туған күні, ЖСН, азаматтығы;
- egov.kz порталындағы жеке кабинетінде балалар туралы мәліметтердің болуы, тіркелуі және дұрыстығы (осы ресурста баланың ата-анасына бекітілген баланың нысаналы талаптары бойынша егжей-тегжейлі үзінді көшірме ұсынылады).
Егер балада жеке басын куәландыратын құжат, ЖСН жоқ болса, тұрғылықты жері бойынша «Азаматтарға арналған үкімет» мемлекеттік корпорациясына (ХҚКО) жүгінген жөн. Сондай-ақ азаматтығы жоқ, анықталмаған немесе ол дұрыс көрсетілмеген болса, онда тұрғылықты жері бойынша көші-қон қызметінің көмегін пайдалану қажет. «Жеке тұлғалар» мемлекеттік дерекқорына қажетті түзетулер енгізілгеннен кейін баланың нысаналы талаптары мен инвестициялық кірісі өткізіп алған кезеңді ескере отырып, келесі жылы толық есептелетін болады.
