Инфографиканы жасаған – Зәуреш СМАҒҰЛ, «EQ»
Бұл – алаңдатарлықтай дерек. Әрине, полиция қызметкерлері көлік руліндегі шопырларға қауіпсіздік ережесін сақтауды ұдайы ескертіп келеді. Бірақ тәртіп сақшыларының кеңесіне құлақ аспай, жүре тыңдаған жүргізушілер жол апатына ұшырап жатыр. Сөйтіп, өздері де, көліктегі өзге жолаушылардың қаза табуына себепкер болғанына бірнеше дерек бар.
Жергілікті полиция қызметі басқармасы басшысының орынбасары Нұрболат Әлекесовтің мәліметіне сүйенсек, жол-көлік оқиғаларының басым бөлігі республикалық маңызы бар тасжолда болатыны анықталып отыр. Мұндай жолда адам өлімінің 61,8 пайызы тіркеледі екен. Статистикалық талдауға сәйкес өңірдегі республикалық санаттағы жолда тіркелген көлік апатынан 55 адам қаза болған.
Сондай-ақ жасөспірімдер зардап шеккен жол-көлік оқиғасының саны едәуір өскен. Сол себептен жол апатының алдын алу үшін 14 мәрте жедел алдын алу іс-шарасы мен рейдтік акция өткізіліпті. Алайда жол-көлік оқиғасы азаяр емес. Жол апатының жиілегеніне алаңдаған оқушылар көлік жүргізушілерге арналған хат жолдады.
«Қымбатты жүргізуші ағай, қоғамдық көліктің қызметін күнделікті пайдаланамыз. Автобуспен үлкендер жұмысқа, біз сабаққа барамыз. Бәріміз үйге қайтарда автобусқа мінеміз. Көлікті абайлап жүргізсеңіз, барлығымыз аман боламыз. Апаттан сақ болу – өз қолыңызда! Сапарыңыз сәтті болғай!», деп жазыпты оқушының бірі.
Полицияның дерегіне жүгінсек, былтыр жол апатынан бір отбасының 6 адамы мерт болған еді. Оның төртеуі – он екіде бір гүлі ашылмаған бейкүнә сәби. Ал тағы бір көлікте 7 адам бақилық болды. Естіген адамның жанын түршіктіретін мұндай деректер сол мезетте әлеуметтік желі арқылы көпшілікке тарап жатыр. «Ел құлағы – елу» дегендей, жол апаты туралы деректі естіп, тіпті бейнежазбасын смартфоннан көрсе де, күре жолда желік қуғандай еліретін жүргізушілер азаяр емес.
Кейде полиция қызметкерлерін оқ атуға мәжбүр ететін жүргізушілер бар. Мәселен, өткен жылғы қарашада «Dalmlerchr Sler» жүк көлігінің шопыры инспектордың аяғын басып кетті. Полиция қызметкерлері оны тоқтату үшін аспанға, кейін көлік дөңгелегіне екі реттен оқ атты. Өйткені көлік жүргізушісі жергілікті уақытпен сағат 11:45 шамасында «Атырау-Орал» тасжолының 183-шақырымы тұсында жылдамдықты шамадан тыс асырған. Алайда көлік жүргізушісі патрульдік полиция инспекторларының заңды талабына бағынбай, қаша жөнелген. Тәртіп сақшылары Индербор кентінде қызметтік көліктермен алдын бөгеп, тоқтатқан еді. Жүк көлігі тоқтатылғанымен, жүргізуші кабинадан түспестен қашып құтылуға тырысты. Сол кезде патрульдік полиция инспекторының оң аяғын басып кетіп, жол бойындағы бірнеше автокөлікке апатты жағдай тудырды.
Әрине, заңды талапқа бағынбаған, тіпті полицияның аяғын басқан жүргізуші құтылған жоқ. Оның көлігі тоқтатылды, өзі ұсталды. Бірақ таңданыс тудыратын екі жайт бар. Біріншісі – оның мас еместігі. Екіншісі – көліктің өзінікі еместігін айтып, бас тартуы.
Жол-көлік оқиғалары биыл да қайталанып жатыр. Мәселен, жыл басталғалы бері 15 жол-көлік оқиғасы тіркелген. Апат салдарынан 6 адам қаза тауып, 14 адам дене жарақатын алған.
Полицейлердің пікірінше, жол апатының бірнеше себебі бар. Біріншіден, алдағы көлікті басып озу талабы бұзылады. Екіншіден, жылдамдықты шамадан тыс арттырумен байланысты болып отыр. Өкінішке қарай, жолда жүру ережесі сақталмайды. Мұның бәріне алдымен рульдегі жүргізуші кінәлі екені даусыз. Өйткені көлік жүргізгендер жауапкершілікті сезінбей, желік қуғандай асығады. Сөйтіп, «Асыққан – шайтанның ісі» деген тәмсілді естен шығарады.
«Патрульдік полиция қызметкерлері республикалық маңызы бар автомобиль жолдарын тәулік бойы қадағалайды. Қауіпсіздікті сақтау үшін 15 бақылау-өткізу бекетінде көлік жүргізушілеріне ықтимал апаттар туралы ескертеді. Жақында полицейлерге «Cyber Sheriff» мобильді аппараты бар 28 көлік, 4 әуе дроны, 8 «Оракул-Инсайт» мобильді-тасымалау және «Трафик-Сканер» стационарлық жылдамдық өлшегіш құрылғысы берілді. Қазір тасжолдарда жылдамдықты өлшейтін құрылғыларды орнату жұмыстары жүргізіліп жатыр», дейді Н.Әлекесов.
Атырау облысы
